ՆախընտրելիՀայաստանի նախագահ Արմեն Սարգսյանն այսօր՝ մարտի 28-ին, աշխատանքային նախաճաշ է ունեցել Առաջնորդության դպրոցի ունկնդիրների հետ: այս մասին NEWS.am-ը տեղեկանում է ՀՀ նախագահի պաշտոնական կայքից։
Նախագահն անմիջական զրույց է ունեցել երիտասարդների հետ, պատասխանել երկրի զարգացման տեսլականին, տնտեսության հեռանկարային ոլորտներին վերաբերող նրանց հարցերին, ինչպես նաև լսել երիտասարդների կարծիքներն ու տեսակետները:
Ձեռքսեղմումների ժամանակ դպրոցի օտարերկրացի սաներից մեկի ակցենտով «բարև ձեզ, ո՞նց եք»–ին Արմեն Սարգսյանը պատասխանել է նրա ակցենտով՝ «Լավ եմ, դո՞ւ ոնց ես»։
Ընդգծելով երիտասարդների՝ որպես վաղվա առաջնորդների դերը՝ նախագահը կարևորել է նրանց մասնակցությունն ու ներգրավվածությունը երկրի կյանքի տարբեր բնագավառներում:
Նախագահը նշել է, որ երկրի առաջընթացն ապահովող բոլոր ոլորտներում պետք է ձգտել լինել լավագույնը, իսկ դրան հասնելու հիմնավոր ճանապարհը կրթությունն է:
