նախընտրելի դարձնելՕրերս Ազգային անվտանգության ծառայությունից ոստիկանության ԿՀԴՊ գլխավոր վարչություն օպերատիվ տվյալներ են ստացվել Լոռու մարզի Հարթագյուղ համայնքի ղեկավարի թույլ տված չարաշահումների վերաբերյալ։ Ոստիկանությունից NEWS.am-ին հայտնում են, որ տեղեկությունների հիման վրա գլխավոր վարչության կոռուպցիայի եւ տնտեսական գործունեության դեմ ուղղված հանցագործությունների հակազդման վարչության ծառայողները, համագործակցելով ոստիկանության Լոռու մարզային վարչության եւ Սպիտակի բաժնի աշխատակիցների հետ, ձեռնարկել են օպերատիվ-հետախուզական տարաբնույթ միջոցառումներ՝ պարզելով հետեւյալը։
Նախնական տվյալներով՝ Հարթագյուղի համայնքապետը 2014-2019 թվականներին համայնքի երկու բնակչի ձեւակերպել է համայնքապետարանի սանտեխնիկ ու բակապահ։ Նրանք փաստացի աշխատանքի չեն ներկայացել, իսկ որպես աշխատավարձ փոխանցված 9․940․310 դրամը համայնքի ղեկավարը վատնման եղանակով հափշտակել է։
Փաստական տվյալներ են ձեռք բերվել նաեւ, որ 2014-2017 թվականներին համայնքի ղեկավարը մի խումբ բնակիչների անվամբ կազմել ու հաստատել է սոցիալական օգնություններ տրամադրելու վերաբերյալ կեղծ դիմումներ՝ յուրացնելով այդ կապակցությամբ դուրս գրված կես միլիոն դրամը։
Օպերատիվ հետախուզական միջոցառումների արդյունքում պարզվել է նաեւ, որ Հարթագյուղ համայնքի ավագանու անդամներից 3-ը 2015-2019 թվականներին գտնվել են արտերկրում եւ փաստացի չեն մասնակցել ավագանու նիստերին։ Պարզվել է նաեւ, որ համայնքի ղեկավարը, աշխատակազմի քարտուղարի օժանդակությամբ, պաշտոնական փաստաթուղթ հանդիսացող ավագանու մի շարք որոշումներում կեղծել է նրանց ստորագրությունները։
Բացի այդ, փաստական տվյալներ են ձեռքբերվել, որ 2017 թվականին համայնքի ավագանու եւ ղեկավարի որոշումներով համայնքային սեփականություն հանդիսացող անավարտ շինություն եւ հողամաս նվիրաբերվել է մի բնակչի, որից համայնքի ղեկավարը պահանջել ու ստացել է 300․000 դրամ կաշառք։ Դեպքերի առթիվ ոստիկանության ԿՀԴՊ գլխավոր վարչությունում քրեական գործ է հարուցվել, որն ուղարկվել է քննչական կոմիտե՝ նախաքննության։
Դարձյալ Ազգային անվտանգության ծառայությունից ոստիկանության ԿՀԴՊ գլխավոր վարչություն ստացված օպերատիվ տվյալների համաձայն՝ Լոռու մարզի Գոգարան համայնքի ղեկավարը թույլ է տվել մի շարք ապօրինություններ։
Տեղեկությունների հիման վրա ձեռնարկված օպերատիվ-հետախուզական միջոցառումների արդյունքում ոստիկանության ծառայողները փաստական տվյալներ են ձեռք բերել, որ համայնքի ղեկավարը 2014-2017 թվականներին մի խումբ բնակիչների անվամբ կազմել ու հաստատել է սոցիալական օգնություններ տրամադրելու վերաբերյալ կեղծ դիմումներ՝ այդ կապակցությամբ դուրս գրված մեկ միլոն դրամը մուտքագրելով որպես հողի հարկի վճարներ։
Օպերատիվ հետախուզական միջոցառումների արդյունքում պարզվել է նաեւ, որ Գոգարան համայնքի ավագանու անդամներից 2-ը տարբեր ժամանակահատվածներով գտնվել են արտերկրում եւ փաստացի չեն մասնակցել ավագանու նիստերին։
Համայնքի ղեկավարը պաշտոնական փաստաթուղթ հանդիսացող ավագանու մի շարք որոշումներում կեղծել է նրանց ստորագրությունները։ Դեպքերի առթիվ ոստիկանության ԿՀԴՊ գլխավոր վարչությունում քրեական գործ է հարուցվել, որն ուղարկվել է քննչական կոմիտե՝ նախաքննության։
