Նոյեմբերի 21-ին ոստիկանության Կապանի բաժնում բնակարանային գողության վերաբերյալ հաղորդում ստացվեց. մի կնոջ բնակարանից հափշտակել էին չհչկիզվող պահարան, որի մեջ եղել էր 20․000 դոլար ու 30-ից ավելի ոսկյա զարդ։

Ոստիկանությունից NEWS.am-ին հայտնում են, որ ոստիկանության Քրեական հետախուզության գլխավոր վարչության, Սյունիքի մարզային վարչության ու Կապանի բաժնի ծառայողները համատեղ միջոցառումներով փաստական տվյալներ ձեռք բերեցին գողությունը կատարած անձի ինքնության վերաբերյալ։ Օպերատիվ միջոցառումներով հայտնի դարձան նաեւ դեպքի հանգամանքները։

Նոյեմբերի լույս 24-ի գիշերը կասկածյալը հայտնաբերվեց ու բերման ենթարկվեց ոստիկանություն։ Քաջարանի բնակիչ, 38-ամյա տղամարդը ներկայացվեց դեպքի նախաքննությունը վարող մարմնին, խոստովանական ցուցմունք տվեց ու ձերբակալվեց։

Հետագա միջոցառումներով իրավապահները ձորակում հայտնաբերեցին նաեւ չհրկիզվող պահարանը, որն արդեն դատարկ էր։

Հարուցված քրեական գործի նախաքննությունը շարունակվում է։