նախընտրելի դարձնելԽաղաղության մասին Հայաստանի եւ Ադրբեջանի պատկերացումները համարժեք են։ Այս մասին այսօր՝ մարտի 9-ին, լրագրողների հետ զրույցում ասաց ԱԺ պաշտպանության եւ անվտանգության մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Անդրանիկ Քոչարյանը։
Դիմելով Yerevan.Today-ի լրագրողին՝ Անդրանիկ Քոչարյանը նշեց, որ այդ պատկերացումները չեն համընկնում լրագրողի եւ տվյալ լրատվամիջոցի ղեկավարության պատկերացումներին։ Պատգամավորը հավելեց, որ Հայաստանի իշխանությունը գնում է խաղաղություն։
«Ամբողջ աշխարհն այսօր անհանգիստ է, եւ ոչ թե վատ պահվածքն է պետք քննարկել, այլ այն, թե մենք ինչ ենք անում, որ թշնամին չկարողանա դիմել այդ պահվածքին։ Մարտի 7-ի լույս 8-ի գիշերը ականանետից երկու-երեք կրակոց է եղել, այլ գործողություններ չեն եղել։ Կրակոցներ են եղել դպրոցի ուղղությամբ։ Ականանետից արձակված մեկ արկ ընկել է մեր դիրքերի թիկունքը։ Հայկական կողմից զոհեր եւ վիրավորներ չկան»,- նշեց նա։
Քոչարյանը հիշեցրեց նաեւ Լիսագորի շրջանում վնասված գազատարի մասին՝ այդ բոլոր գործողությունները բացատրելով նրանով, որ հրադադարի պատասխանատու եւ երաշխավոր Ռուսաստանը գտնվում է գործողությունների ակտիվ փուլում մեկ այլ անհանգիստ վայրում։
«Թշնամին, թերեւս, օգտվում է դրանից եւ փորձում դժվարություններ ստեղծել ղարաբաղյան ուղղությամբ։ Ամենայն հավանականությամբ, այդ խնդիրներն իրենց լուծումները կգտնեն Ռուսաստանի եւ Ադրբեջանի միջեւ երկխոսության միջոցով։ Կարծում եմ՝ Արցախի ղեկավարությունը եւս մասնակցություն ունի»,- հավելեց նա։
Նրա խոսքով՝ այսօր առկա սահմանային իրողությունները եղել են նաեւ նախկինում։ «Յուրաքանչյուր դեպք պետք է քննվի, քանի որ դա խախտում է այն տրամաբանությունը, որի շուրջ հստակ պայմանավորվածություններ կան հրադադարի ռեժիմի պահպանման վերաբերյալ։ Մեղավորները պետք է պատժվեն՝ անկախ նրանից՝ ով է մեղավոր՝ մենք, թե թշնամին։ Խաղաղություն չի նշանակում կորցնել բոլոր դիրքերը, այլ նշանակում է հասնել այնպիսի խաղաղության, որը կբացառի ներկայիս իրողությունները»,- եզրափակեց պատգամավորը։
