նախընտրելի դարձնելԿառավարությունը ձգտում է վերացնել Հայաստանից փոքրածավալ արտահանմամբ զբաղվող ընկերությունների համար խոչընդոտները։ Այս մասին այսօր՝ մարտի 16-ին, ԱԺ տնտեսական հարցերի մշտական հանձնաժողովի նիստում «Պետական տուրքի մասին» օրենքում փոփոխություններ կատարելու մասին օրենքի նախագծի քննարկման ժամանակ ասաց էկոնոմիկայի նախարար Վահան Քերոբյանը։
Նրա խոսքով՝ մինչեւ 1 միլիոն դրամի ապրանք արտահանելիս մաքսատուրք չի գանձվի։ Հայաստանի Հանրապետության սահմանով մեկ մատակարարի կողմից մեկ ստացողին մեկ տրանսպորտային փաստաթղթով փոխադրվող ապրանքները (բացառությամբ արտահանման, ներառյալ ԵԱՏՄ անդամ պետություն), որոնց ընդհանուր մաքսային արժեքը 200 եվրոյից ոչ ավելի է, կազատվեն պետական տուրքից։ «Միեւնույն ժամանակ, մեկ մատակարարի կողմից Հայաստանի սահմանով մեկ տրանսպորտային փաստաթղթով մեկ ստացողին փոխադրվող ապրանքները, ներառյալ ԵԱՏՄ անդամ երկրներ արտահանումը, որոնց ընդհանուր մաքսային արժեքը չի գերազանցում 1 միլիոն դրամը, նույնպես կազատվեն պետական տուրքից»,- պարզաբանեց նա։
Նախարարը նշեց, որ նշված նախագծի աշխատանքային անվանումը «Volterman» է։ Այդպես այն կոչել են էկոնոմիկայի նախարարությունում։ Խոսքը, մասնավորապես, «Volterman» ընկերության դրամապանակների մասին է։ Ավելին, տվյալ փոփոխությունն առաջարկել է հենց ընկերությունը։ Այս եւ շատ այլ ընկերություններ բախվում են համացանցում ապրանք վաճառելիս եւ Հայաստանից ապրանք արտահանելիս խնդիրների։ Նույնիսկ շատ չնչին գումարով ապրանք արտահանելիս ստիպված են մաքսատուրք վճարել, որը որոշ դեպքերում կարող է նույնիսկ գերազանցել հենց ապրանքի արժեքը։ Բացի այդ, ապրանքների մաքսազերծումը շատ ժամանակ է պահանջում։
«Օրինակ, Volterman ընկերության դրամապանակները՝ 250 դոլար միջին արժեքով, մի քանի օրվա ընթացքում անցնում են մաքսային ընթացակարգ։ Ստացվում է, որ խնդրահարույց է դառնում մանրածախ առեւտուր իրականացնել Հայաստանում եւ արտերկրում»,- նշեց Քերոբյանը։
Սակայն Կառավարության առաջարկած փոփոխությունները կհանգեցնեն պետական բյուջեի եկամուտների կրճատման։ Խոսքը մոտ 100 միլիոն դրամի մասին է։ «Սա բացասաբար կանդրադառնա բյուջեի վրա, բայց էապես կբարելավի Հայաստանից փոքրածավալ արտահանումը»,- վստահեցրեց էկոնոմիկայի նախարարը։
ԱԺ մշտական հանձնաժողովը որոշ քննարկումներից հետո դրական եզրակացություն տվեց կառավարության օրենսդրական նախաձեռնությանը։
