նախընտրելի դարձնելՆիկոլ Փաշինյանի հրահանգով ոստիկանները կազմակերպել էին «կոլցո» օպերացիա ժողովրդին ջարդելու համար։ Այս մասին այսօր՝ հունիսի 3-ին, Ֆրանսիայի հրապարակում լրագրողների հետ զրույցում հայտարարեց ԱԺ փոխխոսնակ, ՀՅԴ ԳՄ ներկայացուցիչ Իշխան Սաղաթելյանը։
«Մեր պահանջն էր միայն՝ բացել Դեմիրճյան փողոց։ Իրենք «կոլցո» օպերացիայով փորձել են ջարդել ժողովրդին, ինչի համար պատասխան են տալու։ Ազգային ժողովից մի քանի անձնավորություններ շարժման սկզբից փորձում են հիմքեր գտնել ինձ կալանավորման տանելու համար։ Ես պատասխանատվություն եմ կրում այս շարժման համար եւ հայտարարում եմ՝ ես պատասխանատվություն կրում եմ այն քաղաքացու համար, ում ոտքերը ջարդել է ոստիկանը եւ այն ոստիկանի համար, որը վնասվել է։ Ես պատասխանատվությունից թռնող չեմ»,- ասաց Սաղաթելյանը։
Իշխան Սաղաթելյանի խոսքով՝ իշխանությունը դիմել է նման քայլի, քանի որ տեսել է՝ 35 օրվա ընթացքում շարժման թափը չի նվազել։
«Ինքն ասում էր՝ ես ուժ չեմ կիրառում, հրապարակը չեմ ցրում, բայց տակից բոլորին ջարդում էր՝ խուզարկություններ, ձերբակալություններ, բերման ենթարկել։ Տեսավ դա էլ օգուտ չի տալիս, անցավ իր ձեռագրին, դե ինքը միշտ արյան ծարավ է։ Քիչ արյուն է թափել, էլի է ուզում՝ հանուն իր աթոռի։ Կարծես հատուկջոկատայիններ մտած լինեին ժողովրդի մեջ՝ վրեժ լուծելու։ Այլ բացատրություն չկա։ Սա հաստատում է մեր վարկածը՝ ոստիկանական համազգեստով կան հանցագործներ, որոնք ղեկավարվում են այլ վայրից»,- նշեց Իշխան Սաղաթելյանը։
Հիշեցնենք, որ ԱԺ ընդդիմադիր «Հայաստան» եւ «Պատիվ ունեմ» խմբակցությունները այսօր՝ հունիսի 3-ին, նախաձեռնել էին ԱԺ արտահերթ նիստ, որի օրակարգում ԱԺ հայտարարության նախագիծն էր՝ հայ-ադրբեջանական եւ հայ-թուրքական հարաբերությունների կապակցությամբ, սակայն ՔՊ-ական պատգամավորները չեն ներկայացել նիստին եւ տապալել են այն: Նիստը վարող ԱԺ նախագահ Ալեն Սիմոնյանը հայտարարել էր, որ գրանցումը շարունակվում է մինչև անհրաժեշտ թվով պատգամավորների գրանցումը, բայց ոչ ավելի, քան 4 ժամ: 4 ժամը լրացել է ժամը 20։00–ին։
Դրանից հետո ընդդիմադիր պատգամավորները վերադարձել են Ֆրանսիայի հրապարակ, որտեղից էլ երթով հասել են Կառավարության շենք եւ շրջափակել բոլոր մուտքերը:
«Որեւէ մեկը շենք մտնելու փորձ չանի: Կառավարության բոլոր 6 մուտքերը փակում ենք, հետո ես կվերադառնամ էստեղ, մեր բոլորի պահանջը կհնչեցնեմ: Ոստիկանների հետ կոնֆլիկտի մեջ չենք մտնում»,- հայտարարել էր Սաղաթելյանը:
Մոտ երեք ժամ անց շարժման անդամները բացեցին Կառավարության բոլոր մուտքերը եւ շարժվեցին դեպի Կառավարական առանձնատուն, որտեղ՝ ըստ Իշխան Սաղաթելյանի, գտնվում էր Նիկոլ Փաշինյանը։
«Եկել ենք այստեղ մեկ պահանջով՝ դուրս արի եւ պատասխանիր ժողովրդի հարցերին։ Եթե ռիսկ չես անում դուրս գաս, ասա քեզ հարմար տեղ ու ժամ։ Դու պետք է պատասխանես այս հարցերին։ Եթե ոչ, րոպե առաջ պետք է հեռանաս։ Այսպես փախնելով իշխանությունը երկար պահել հնարավոր չէ»,- առանձնատան դիմաց հայտարարեց ԱԺ փոխխոսնակ, ՀՅԴ ԳՄ ներկայացուցիչ Իշխան Սաղաթելյանը։
Երբ ցուցարարները ցանկանում էին շարժվել դեպի Ազգային ժողով, ոստիկանները հրաժարվեցին բացել ճանապարհը, ոստիկանների եւ ցուցարարների միջեւ սկսվեց բախում։ Ոստիկանները բիրտ ուժ կիրառելով, անգամ հարվածներ հասցնելով բերման ենթարկեցին բազմաթիվ ցուցարարների։ Նրանք նաեւ հատուկ միջոցներ կիրառեցին, մասնավորապես՝ ծխարձակող, լուսաձայնային նռնակներ։ Բազմաթիվ քաղաքացիների ինքնազգացողությունը վատացավ, այդ թվում՝ մեկ ոստիկանի։ Երկու տասնյակ քաղաքացի տեղափոխվել է հիվանդանոց։
