նախընտրելի դարձնելԵս գիտեմ, որ Հայաստանում երբեմն անալոգիաներ են անցկացնում Կոսովոյի եւ Ղարաբաղի միջեւ։ Դա սխալ է, անալոգիաներ անցկացնել չի կարելի։ Այս մասին NEWS.am-ի թղթակցի հետ զրույցում ասաց «Ռեգնում» լրատվական գործակալության գլխավոր խմբագիր Մոդեստ Կոլերովը։
«Մենք Ռուսաստանում 2000-ականներից սկսած պայքարում ենք հենց Կոսովոյի նախադեպի ձեւակերպման համար, որպեսզի այն կիրառվի Աբխազիայի, Հարավային Օսիայի, Մերձդնեստրի նկատմամբ»,- ասաց նա: Այդ բանաձեւին, ինչպես հիշեցրեց Կոլերովը, հունվարին կողմ հանդես եկավ նաեւ նախագահ Պուտինը՝ ուղղակիորեն հղում անելով Կոսովոյի նախադեպին։ Ղարաբաղի համար պայքարում Հայաստանն ավելի վաղ օգտագործել է Կոսովոյի նախադեպի այս հռետորաբանությունը։ Թեեւ այս դեպքում Հայաստանը Ղարաբաղի նկատմամբ հանդես կգար ինչպես Ալբանիան Կոսովոյի հետ կապված, բայց դա արդեն չափազանց բարդ է քաղաքական հռետորաբանության համար։ Այս իրավիճակում Սերբիայի իրավունքները Կոսովոյի նկատմամբ, որոնք նշված են ՄԱԿ-ի բանաձեւում, նրա գնահատմամբ, այլ բնույթ են կրում։
«Այստեղ կարեւոր է, որ Կոսովոն, որպես անկախ պետություն, արդեն ճանաչված է աշխարհի պետությունների կեսի կողմից։ Կոսովոյում ՆԱՏՕ-ի կոնտինգենտն է, Կոսովոն անմիջականորեն շփվում է Եվրամիության մարմինների հետ եւ նույնիսկ իր պաշտոնական դրոշն է զարդարել Եվրամիության աստղերով։ Եթե Հայաստանն ուզում է Կոսովոն իր համար ինչ-որ նախադեպ համարել, ապա պետք է հրաժարվի բոլոր անիմաստ հույսերից։ Կոսովոյի գլխավոր նախադեպը Կոսովոն եվրատլանտյան ուժերի ցատկահարթակի վերածումն է։ Նրանք արդեն խոստովանում եւ աչք են փակում գերի ընկած սերբերի, այդ թվում՝ կանանց եւ երեխաների՝ օրգանների մասնատման վրա։ Եթե ներգրավվի Արեւմուտքը, եւ բալանսը նրա համար ոչինչ չի նշանակում, նա ցինիկ կլինի: Եվ նրան ոչինչ չի կանգնեցնի»,- շեշտեց նա։
Նա միամիտ անվանեց հույսերն առ այն, որ Ղարաբաղի հայերի իրավունքները լրացուցիչ պաշտպանություն կստանան եւ Հայաստանը կկարողանա պաշտպանել իրեն եւ Ղարաբաղը, երբ Երեւանը փոխի իր վեկտորը ՀԱՊԿ-ից, ԵԱՏՄ-ից, երբ, ինչպես տեսնում ենք հիմա, Հայաստանը մեծ քայլերով կմոտենա Եվրամիության կառույցներին, իր համար վաղուց գոյություն չունեցող Մինսկի խումբ կհորինի, որտեղից դուրս է եկել Ռուսաստանը։ «ՆԱՏՕ-ի դանդաղ, բայց կոշտ արձագանքը սերբերի՝ իրենց սերբերին պաշտպանելու փորձին. ահա թե ինչ է Կոսովոյի նախադեպը։ Սերբերը քաղաքավարի կերպով փորձեցին պաշտպանել իրենց սերբերին իրենց՝ ՄԱԿ-ի տարածքում, սակայն նրանց ոտքերի տակ գցեցին, եւ նրանք հանձնվեցին: Ցանկանու՞մ եք օգնություն ստանալ այդ նատոյականներից, ովքեր հիմա պաշտպանեցին կոսովցիներին, ովքեր ոտնահարում են սերբերի իրավունքները Կոսովոյում: Դա միամտություն է, ոչինչ չի լինելու»,- համոզված է գլխավոր խմբագիրը։
Նա վստահ է, որ Եվրամիությունը եւ ՆԱՏՕ-ն չեն պաշտպանի Հայաստանին եւ Լեռնային Ղարաբաղին, նախ եւ առաջ՝ այն պատճառով, որ հարավկովկասյան տարածաշրջանում ՆԱՏՕ-ն գործում է ի դեմս Թուրքիայի։ «Ես չգիտեմ, թե ինչին են ապավինում Հայաստանի իշխանությունները։ Ես դեռ կարող եմ որոշակի հույսեր կապել նրա հետ, որ ռուս խաղաղապահները կմնան Ղարաբաղում, եւ դա ինչ-որ հավասարակշռություն կնշանակի։ Բայց պետք է ազնիվ լինել. խաղաղապահներն այնտեղ առանց իրավական հիմքերի են, մանդատի երկարաձգումը երաշխավորված չէ, մանդատի բուն բանաձեւը հաստատված եւ լեգիտիմացված չէ Ադրբեջանի կողմից։ Հայաստանի իշխանությունները, ուժերի ներածին չափով Ղարաբաղը Ռուսաստանի հովանավորչության տակ խցկելու փոխարեն իրենց Եվրամիության հովանավորչության տակ են խցկում։ Այդ խցկելու գինը, այդ մանդատի գինը մինուս Ղարաբաղն է։ Ղարաբաղի հայ ժողովրդի հետ ոչ մի նոր անհայտ բան չի լինի, այն Ռուսաստան կգնա, որտեղ իրեն լավ կլինի։ Բայց առանց հայկականի Ղարաբաղ չի լինի»,- հավելեց նա:
«Ինչ վերաբերում է Թայվանին, ապա դա կապված չէ Կոսովոյի հետ, քանի որ Թայվանը գտնվում է Չինաստանի իրավասության մեջ եւ ամեն դեպքում, ամեն գնով կմիացվի Չինաստանին»,- հավելել է Կոլերովը։
