նախընտրելի դարձնելՄի քանի տարի շարունակվող դատական վեճերից հետո սկսվել է Իռլանդիայի գնչուների վտարումը Dale Farm (Դեյլ Ֆարմ) բնակավայրից, որը Անգլիայի հարավ-արեւելքում գտնվող Էսսեքս կոմսության տարածքում է:
Վտարման գործընթացն սկսվել է ոստիկանության հետ բախումից հետո, որի ընթացքում գնչուները քարեր եւ աղբ են նետել:
Ինչպես հայտնում է BBC-ն, դատարանը որոշել է, որ Իռլանդիայի գնչուները այդ տարածքում ապօրինի են բնակավայրեր հիմնել, բայց բնակիչները համամիտ չեն այս որոշմանը:
Dale Farm-ը համարվում է իռլանդական քոչվորների ամենախոշոր բնակավայրերից մեկը:
Իռլանդական քոչվորները, որ առավել հայտնի են իբրեւ «պեյվաներ» կամ իռլանդական գնչուներ, այստեղ հիմնավորվել են 1980-ական թվականներին, երբ մի քանի ընտանիքներ այստեղ հողատարածք են գնել եւ տներ կառուցել: Ժամանակի ընթացքում նրանց շրջակա տարածքն ընդլայնվել է, ավելացել են հարազատների տները ` այն տարբերությամբ, որ վերջիններս անօրինական են կառուցվել` քաղաքային հողերի հաշվին:
Այսօրվա դրությամբ գնչուական ճամբարում ապրում է 83 ընտանիքների մոտ 1000 մարդ:
