նախընտրելի դարձնել«Հայաքվե» նախաձեռնությունը Ազգային ժողով է մուտքագրել օրինագիծ, որով առաջարկում է լրացումներ կատարել ՀՀ քրեական օրենսգրքում՝ Հայաստանի անունից Արցախն Ադրբեջանի մաս ճանաչող, ինչպես նաև Հայոց ցեղասպանությունը ժխտող պաշտոնատար անձանց համար պատիժ սահմանել 10-15 տարվա ազատազրկում։
Ավելի վաղ հայտնել էինք, որ ՀՀ կենտրոնական ընտրական հանձնաժողովը հաստատել է նախաձեռնության ներկայացրած ստորագրությունների վավերականությունը։ Նախաձեռնող խումբը ստորագրությունների հավաքման համար ուներ 60 օր՝ հունիսի 21–ից օգոստոսի 19–ը ներառյալ, բայց «ՀայաՔվեի» ստորագրահավաքն ավարտվեց օգոստոսի 5–ին, քանի որ արդեն իսկ հավաքվել էր 58 հազար ստորագրություն։
Նախաձեռնության անդամ Ավետիք Չալաբյանը լրագրողների հետ զրույցում անդրադարձավ իրենց հաճախ տրվող հարցին, թե որքանո՞վ է արդիական Ադրբեջանի կողմից Արցախի օկուպացիայից և այնտեղ իրականացված էթնիկ զտումներից հետո այս օրենքի նախագիծը։
«Մենք կարծում ենք, որ ավելի քան արդիական է, քանի որ այն, ինչ տեղի է ունեցել Արցախում, միջազգային իրավունքի կոպտագույն խախտում է։ Արցախը հանդիսացել է միջազգային իրավունքի սուբյեկտ, այն տասնամյակներ շարունակ եղել է բանակցային կողմ, եղել են մադրիդյան սկզբունքներ, որոնք մշակվել են Մինսկի խմբի համանախագահների կողմից, ուստի Արցախը` որպես միջազգային իրավունքի սուբյեկտ, չի կարող մեկ օրում վերանալ էթնիկ զտման արդյունքում»,– ասաց նա։
Չալաբյանը վստահ է, որ եթե ԱԺ մեծամասնությունը դեմ քվեարկի այս նախագծին` հանցակից կդառնա Արցախի ժողովրդի նկատմամբ Ադրբեջանի ցեղասպան գործողություններին։
Անդրադառնալով, թե ինչ է սպասվում այս նախագծին ԱԺ մուտքագրումից հետո, Չալաբյանը մանրամասնեց, որ, ըստ օրենքի, ԱԺ նախագահը պետք է մակագրի օրենքի նախագիծը պետաիրավական հարցերի հանձնաժողովին, վերջինս պետք է կազմակերպի համապատասխան լսումներ, առաջարկների հավաքագրում, դրա հիման վրա պետաիրավական հանձնաժողովը պետք է իրականացի նախագծի քննարկումը։ Ենթադրաբար դա կտեւի 1-1,5 ամիս։
«Հուսով եմ՝ այդ ընթացքում լուրջ փոփոխություններ տեղի կունենան, որոնք ևս մեկ անգամ կհավաստեն, որ այն գործընթացը, որը մենք սկսել ենք, բացարձակ արդիական է, լրացուցիչ կռվան է տալիս Հայաստանին, որպեսզի մենք պաշտպանենք և մեր ինքիշխանությունը, և Արցախի բնակիչների բնական իրավունքները»,- ասաց «Հայաքվե» նախաձեռնության համակարգողը։
Հիշեցնենք` «ՀայաՔվե» նախաձեռնության օրենքի նախագիծը խիստ պատիժ է նախատեսում Լեռնային Ղարաբաղի ինքնորոշումից հրաժարվելու և Հայոց ցեղասպանության նշանակությունը նսեմացնելու համար: Այն ԱԺ-ում պետք է ընդունվի պատգամավորների ձայների մեծամասնությամբ:
