նախընտրելի դարձնելՄոլդովայում իշխանությունները կատարվածին չէին սպասում․ երկրի բնակիչները եվրաինտեգրմանը դեմ են քվեարկել, և եվրոպական ինտեգրմանը հիմնականում կողմ են քվեարկել երկրի սահմաններից դուրս ապրող մոլդովացիները, NEWS.am-ի «Ուժի գործոն» հաղորդաշարի եթերում նման տեսակետ է հայտնել Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
«Այնտեղ մեծաթիվ ռուսներ են ապրում, կան նաև ռուսախոս մոլդովացիներ։ Եթե Վրաստանում եվրոպամետ կողմնորոշումից հեռանալն անհնար է պատկերացնել, ապա Մոլդովայում տեսականորեն դա կարող եմ պատկերացնել, քանի որ բնակչության մի հսկայական հատված դեմ է Եվրոպային»,- ընդգծել է նա։
Ըստ Իսկանդարյանի՝ արևմտյան երկրները, չնայած այս ամենին, աջակցություն են հայտնում Մոլդովային եվրաինտեգրման հարցում, քանի որ դրա քաղաքական անհրաժեշտությունը կա՝ պայմանավորված երկրի աշխարհագրական դիրքով։
«Եթե այդ երկրի նախագահ Սանդուն, այնուամենայնիվ, կարողանա վերընտրվել, ապա պետք է հաշվի առնել, որ շուտով այնտեղ խորհրդարանական ընտրություններ են անցկացվելու, իսկ այդ ժամանակ շատ դժվար է լինելու հաղթել, իսկ դա կարող է խորհրդարանի հետ փոխգործակցության խնդիրներ առաջացնել՝ հաշվի առնելով, որ նախագահը շատ քիչ լիազորություններ ունի»,- նշել է Իսկանդարյանը։
Նրա կարծիքով՝ Մոլդովայի ընտրությունները ցույց տվեցին, որ դրսից որոշակի որոշումներ կախված են աշխարհաքաղաքական նպատակահարմարությունից, այլ ոչ թե նրանից, թե այս կամ այն երկիրը կատարե՞լ է արդյոք որոշակի պայմաններ, թե՞ չի կատարել։
