նախընտրելի դարձնելԻշխանություններն ամեն ինչ անում են Հայաստանը թուրքական վիլայեթի վերածելու համար։ Այս մասին հունվարի 28-ին «Եռաբլուր» զինվորական պանթեոնում լրագրողների հետ զրույցում հայտնել է «Հայաստան» խմբակցության պատգամավոր, ՀՅԴ անդամ Գառնիկ Դանիելյանը։
Նրա գնահատմամբ՝ իշխանությունները կարծում են, որ պետք է հնազանդորեն նվաստանան Ալիեւի եւ Էրդողանի առջեւ, կատարեն նրանց բոլոր հրահանգները, հրաժարվեն եւ ուրանան հայ ժողովրդի պատմությունը, պայքարեն հայ եկեղեցու դեմ եւ ոչնչացնեն հայկական ինքնության բոլոր բաղադրիչները։ Խորհրդարանականն ավելացրել է, որ իշխանությունները «հնազանդորեն» նվիրաբերել են Լեռնային Ղարաբաղը, հանձնել Տավուշի մարզի մի մասը եւ շարունակում են այդ գործընթացը։ «Այս տրամաբանությամբ իշխանություններն ի վերջո կհայտարարեն, որ Երեւանը Էրիվան է»,- նշել է Դանիելյանը։
Նա նշել է, որ «Հայաստանում գործում է օկուպացիոն կոլաբորացիոնիստական թշնամական ռեժիմ»։ «Ամբողջ աշխարհում տարակուսանք են հայտնում Հայոց ցեղասպանության մասին Փաշինյանի (ՀՀ վարչապետ– խմբ.) խոսքերի առնչությամբ, այն բանից հետո, երբ նա կասկածի տակ դրեց այդ փաստը՝ կրկնելով Թուրքիայի թեզերը։ Մենք խայտառակում ենք մեզ ամբողջ աշխարհի առաջ։ Այսօր Հայաստանում ստիպված ենք պայքարել հայ մնալու համար»,- ավելացրել է պատգամավորը։
Նա կոչ է արել իր այս հայտարարությունն ընդունել որպես տեղեկություն Փաշինյանի կողմից Հայաստանի եւ հայ ժողովրդի դեմ կատարված հանցագործության մասին։ «Այսօր Հայաստանի բոլոր կառույցները գտնվում են իշխանությունների պատրոնաժի տակ, այլապես նման հայտարարություն անելուց հետո նրան պետք է ձեռնաշղթաներով ուղեկցեին համապատասխան վայր»,- ընդգծել է Գառնիկ Դանիելյանը։
Նա հիշեցրել է, որ անգամ այն երկրում (Շվեյցարիայում- խմբ.), որտեղ նա արել է այդ հայտարարությունը, Հայոց ցեղասպանության ժխտումը քրեորեն պատժելի հանցագործություն է։
