ՆախընտրելիՀՀ արտաքին գործերի փոխնախարար Վահան Կոստանյանը համաձայն չէ դիտարկումների հետ, թե հայ-ադրբեջանական բանակցությունները հայտնվել են փակուղում։
«Ամեն դեպքում, սահմանազատման հանձնաժողովների նիստ տեղի ունեցավ, պայմանավորվածություն կա, որ մոտ շրջանում նոր նիստ պետք է տեղի ունենա»,-այսօր՝ փետրվարի 13-ին, կառավարության նիստից հետո լրագրողների հետ զրույցում հայտարարեց նա։
Ինչ վերաբերում է խաղաղության պայմանագրի շուրջ բանակցություններին՝ ԱԳ փոխնախարարն ասաց, թե բավականին երկար ժամանակ է, ինչ Հայաստանը սպասում է Ադրբեջանի ներկայացված առաջարկների արձագանքներին. «Հույս ունենք՝ կարճ ժամանակում կստանանք, որպեսզի գործընթացը հնարավոր լինի շարունակել»,- ասաց նա։
Կոստանյանը պնդեց՝ Հայաստանը, ինչպես նախկինում, շարունակում է կառուցողական տրամադրված լինել ու ներգրավված լինել բանակցություններում։
Դիտարկմանը, որ Ադրբեջանը շարունակում է սպառնալիքի լեզվով խոսել ու պահանջներ ներկայացնել՝ Կոստանյանը պատասխանեց, թե նման հայտարարությունները միտված են տարածաշրջանում էսկալացիոն ֆոնի ապահովմանը. «Հայաստանը չի տրվելու նման սադրանքների, շարունակելու ենք կառուցողական տրամադրված լինել բանակցություններում»,- հավելեց նա։
Հարցին՝ եթե Ադրբեջանը հարձակվի Հայաստանի վրա ու փորձի ուժով խլել այն «միջանցքը», որը պահանջում են՝ ո՞րն է լինելու ՀՀ գործողությունը՝ ԱԳ փոխնախարարը պատասխանեց, որ Հայաստանը իրեն հասու ողջ գործիքակազմով պետք է պաշտպանի իր տարածքային ամբողջականությունը։
