նախընտրելի դարձնելԽաղաղության պայմանագրի ստորագրումն արագացնելու նախաձեռնությունը Բաքվից է, որը չի ցանկանում բաց թողնել ներկա հնարավորությունը, բայց դա ձեռնտու է նաեւ Հայաստանի իշխանություններին՝ ներքաղաքական տեսանկյունից։ Այս մասին NEWS.am -ի թղթակցի հետ զրույցում ասաց քաղաքագետ Ալեն Ղևոնդյանը։
Նա ենթադրեց, որ փաստաթուղթը բաղկացած է ոչ միայն 17 կետից, այլ նաև հավելվածներից, որոնք ենթադրում են նաև պարտավորություններ, որոնք կարող են կապված լինել տարածքների, սահմանազատման, փախստականների և այլնի հետ։
Փորձագետը կարծում է, որ Հայաստանի իշխանություններին իսկապես անհրաժեշտ է ինչ-որ փաստաթուղթ, որի վրա գրված է «խաղաղության պայմանագիր»՝ այն ընտրողներին վաճառելու համար։
Նա վստահ է, որ ուկրաինական պատերազմի ավարտից հետո Ռուսաստանի ակտիվությունը հարավկովկասյան տարածաշրջանում կկրկնապատկվի։
«Այս պահին Ալիևը ցանկանում է օրակարգից հանել Արցախին առնչվող բոլոր հարցերը, որպեսզի հետագայում այդ գործոնը չօգտագործվի Բաքվի դեմ։ Միևնույն ժամանակ, Ադրբեջանի հզորացումն օբյեկտիվորեն չի բխում Ռուսաստանի շահերից։ Այս տեսանկյունից կարևոր է, թե ինչ պայմանավորվածությունների կգան ԱՄՆ-ը և Ռուսաստանը, իսկ մինչ այդ Բաքուն փորձում է վերացնել բոլոր գործոնները, որոնք կարող են խնդիր ստեղծել»,- հավելեց Ղևոնդյանը։
Նա ընդգծեց, որ խաղաղության պայմանագրի տեքստի շուրջ բանակցությունների ավարտի մասին Հայաստանի և Ադրբեջանի հայտարարություններից հետո Ֆրանսիայի և Գերմանիայի ողջույնները կապված են նրանց աշխարհաքաղաքական շահերի հետ, քանի որ նրանք ցանկանում են, որ հարցն արագ փակվի, որպեսզի Ռուսաստանը ժամանակ չունենա մտնել այդ հարցի մեջ և վերադարձնել այն ամենը, ինչի համար Հայաստանում իշխանության բերվեց ներկայիս ռեժիմը։
«Ուստի Ֆրանսիայի և Գերմանիայի հայտարարություններն ավելի շուտ ուղղված են Ռուսաստանին»,- ասաց քաղաքագետը։
Նա նշեց, որ Հայաստանն ու Ադրբեջանն իրենք չեն կարող լուծարել ԵԱՀԿ Մինսկի խումբը, քանի որ դրա համար անհրաժեշտ է այս խմբում ընդգրկված այլ երկրների հավաքական որոշում։
«Մինչ Թրամփի իշխանության գալը Ռուսաստանը կարծում էր, որ ԵԱՀԿ Մինսկի խումբն այլեւս անելիք չունի, սակայն վերջերս Հայաստանում ՌԴ դեսպանը հայտարարեց, որ Մոսկվայի դիրքորոշումն այս հարցում փոխվել է, քանի որ այս ձևաչափն ունի համանախագահ (նկատի ունի ԱՄՆ-ին), որի հետ հնարավոր է աշխատել»,- եզրափակեց Ղևոնդյանը։
