նախընտրելի դարձնել«Քաղաքացիական պայմանագիր» կուսակցությունը այս պահի դրությամբ չի կարողանա միանձնյա իշխանություն ձևավորել Գյումրիում։ Այս մասին քիչ առաջ իշխող կուսակցության Գյումրիի նախընտրական շտաբի մոտ լրագրողների հետ զրույցում հայտարարել է ԱԺ «Քաղաքացիական պայմանագիր» խմբակցության պատգամավոր Վահե Ղալումյանը։
«Գյումրիում կայացած ավագանու ընտրությունների արդյունքները ցույց են տալիս, որ մեր թեկնածուն՝ երկու ամիս համայնքի պաշտոնակատար աշխատած Սարիկ Մինասյանը, երկու անգամ ավելի ձայն է ստացել 10 տարի Գյումրին ղեկավարած թեկնածուից՝ Վարդան Ղուկասյանից»,- ասել է Ղալումյանը։
Հարցին, թե ինչու գյումրեցիներն այնքան ձայն չտվեցին, որպեսզի իշխող ուժը կարողանա միայնակ ստանձնել քաղաքի կառավարումը, իշխանական պատգամավորը չի պատասխանել՝ ասելով, որ այդ հարցը բնակիչներին է պետք տալ։
«Քաղաքական 9 ուժ է մասնակցել ընտրություններին, ընթացքին հետևել եք՝ բարդ ընտրություններ էին, և եթե երկու ամիս քաղաքապետի պաշտոնակատար աշխատած մարդու գլխավորությամբ ՔՊ-ն գրեթե 40 տոկոս ձայն է հավաքել, չի կարելի դա պարտություն համարել»,- ասել է պատգամավորը։
NEWS.am-ի թղթակցի հարցին՝ արդյո՞ք «50+1» տոկոս ձայն չստանալու պատճառն իշխանության ցածր վարկանիշն է, Ղալումյանը բացասական պատասխան է տվել։
Արմավիրի մարզի Փարաքար համայնքի ավագանու ընտրությունների արդյունքները, որտեղ իշխող կուսակցությունը պարտվել է, Ղալումյանը չի մեկնաբանել՝ ասելով, որ որևէ տեղեկություն չունի այդ մասին։
