նախընտրելի դարձնելԵթե որեւէ ոստիկան կգա, մեզ կասի, որ մենք ձեր փոխարեն վճարում ենք, մենք էլ ճանապարհը կբացենք: Այս մասին այսօր՝ ապրիլի 10-ին, բողոքի ակցիայի ժամանակ հայտարարեց Քասախի բնակիչներից մի կին:
Նշենք, որ քասախցիները պահանջում են վերականգնել թիվ 59 երթուղին, որը Քասախը կապում էր Երեւանին: Նրանք ժամանակ առ ժամանակ փակում են Երեւան-Աշտարակ մայրուղին, սական ոստիկաններին հաջողվում է բացել այն:
Արագածոտնի մարզպետն առաջարկել է ժամը 10:30 հանդիպել, բայց քասախցիները հրաժարվում են մարզպետարան գնալ, ասում են՝ թող ինքը գա մեզ հետ այստեղ հանդիպի:
«Ամբողջ Երեւանը բոյկոտում է, որ ուղեվարձը 150 դրամ է, այսօր մեզ ստիպում են, որ մենք 700 դրամ վճարենք: Ասում են՝ սա քաղաքինը չի, բայց 30-40 տարի մենք Երևանի հետ գիծ ունենք: Հիմա մենք մեր խաղաղ ցույցն ենք անում, ուրիշ ոչ մի բանի հետ մենք գործ չունենք, մենք պահանջում ենք, որ մնա նույն գումարը, նույն գիծը, ուրիշ ոչ մի բան:
Մենք թոռներ ունենք, որ Երեւանում դպրոցում են սովորում, Մալաթիայից ո՞նց կարող են հասնել այստեղ: Երկրորդ դասարանի երեխա կա, որ դուրս է գալիս Մալաթիայից, ու պիտի երկու տրանսպորտ փոխի, ծնողն աշխատում է: Մեր կապը միշտ եղել է քաղաքի հետ, էստեղից Երեւան մեկ կմ էլ չկա»,-ասաց նա:
Մեկ այլ քասախցի էլ հայտարարեց, որ ճանապարհը չեն բացելու մինչեւ իրենց հարցին լուծում տան:
Հիշեցնենք, որ երեկ՝ ապրիլի 9-ին, կառավարությունում ընդունել են Պռոշյան եւ Քասախ բնակավայրերի բնակիչներին՝ այդ գյուղերի տրանսպորտի հարցի քննարկման նպատակով: Հանդիպմանը մասնակցել են վարչապետի աշխատակազմի ներկայացուցիչներ, ՏԿԵ նախարարության տրանսպորտի վարչության պետը, քաղաքապետարանի ներկայացուցիչը:
Հանդիպումից հետո պռոշյանցիները հայտարարեցին, որ իրենց խնդիրը լուծվել է, թիվ 25 երթուղին կպահպանվի, սակայն այն ոչ թե կհասնի գյուղ, այդ ՊՆ նախկին շենքի հատվածից շրջադարձ կատարի եւ կվերադառնա Երեւան: Իսկ ահա Քասախ համայքնի համար թիվ 59 երթուղին հանվում է:
Ավելի վաղ NEWS.am-ը հայտնել էր, որ բողոքի ակցիաները սկիզբ էին առել ապրելի 5-ից։ Պռոշյան և Քասախ համայնքների բնակիչները մինչ այս օգտվում էին թիվ 25 և 59 երթուղին սպասարկող ավտոբուսներից՝ Երևան հասնելու համար վճարելով 150 դրամ։ Հիմա Երևանի քաղաքապետարանը որոշել է, որ ավտոբուսները չեն հասնելու այդ համայնքներ։ Նոր երթուղին սպասարկելու է «Մուլտիտրանսպորտ» ընկերությունը, ուղեվարձը լինելու է 250 և 200 դրամ։ Բացի այս, ինչպես ավելի վաղ ներկայացրել էին բնակիչները, նոր երթուղին սպասարկելու է ընդամենը 7 կմ՝ իրենց համայնքներից հասնելով մինչև Աջափնյակ վարչական շրջանում գտնվող հայտնի Ֆիզիկայի ինստիտուտ, վերջին ավտոբուսը նախատեսված է ժամը 19։30-ին։ Նախկին երթուղու վերջին կանգառը եղել է Հաղթանակի զբոսայգու մոտ։
