նախընտրելի դարձնելԴժվար է մեկնաբանել, թե ինչ տրամաբանությամբ են ադրբեջանցիները գնդակոծում հայկական գյուղերը և ինչու հենց այս ուղղություններով։ Այս մասին ապրիլի 14-ին NEWS.am-ի թղթակցի հետ զրույցում ասաց Սյունիքի մարզից իշխող «Քաղաքացիական պայմանագիր» խմբակցության պատգամավոր Դավիթ Դանիելյանը։
Նա ուշագրավ է համարել, որ հրետակոծությունը սկսվել և ավարտվել է կոնկրետ ժամկետում։ «Սրա մեջ կարծես ինչ-որ սիմվոլիզմ կա»,- նկատեց Դանիելյանը։
Պատգամավորը հայտարարել է Խնածախ այցելելու և բնակչության հետ շփվելու մտադրության մասին։ «Կարծում եմ, որ Ադրբեջանի գործողությունները նպատակ ունեն խաթարել բանակցությունները կամ ուշադրությունը շեղել խաղաղության օրակարգից»,- հավելեց պատգամավորը՝ վստահեցնելով, որ ինքը համագործակցում է Սյունիքի մարզի բոլոր համայնքների ղեկավարների հետ՝ ելնելով մարզի բնակիչների շահերից։
Հիշեցնենք, որ Հայաստանի պաշտպանության նախարարությունը հայտնել էր ադրբեջանական զինուժի կողմից Խնածախ գյուղի գնդակոծման մասին, որի արդյունքում վնասվել էր տեղի մշակութային կենտրոնը։
