ՆախընտրելիՀայաստանի ներկա իշխանությունների գործունեության արդյունքում Ադրբեջանն, ըստ էության, դարձել է «Հայաստանի անվտանգության երաշխավորը»՝ թելադրելով իր պայմանները. բանը հասել է նրան, որ Բաքուն փորձում է միջամտել Հայաստանի ներքին գործերին և ներքաղաքական օրենսդրությանը։ Դրա մասին NEWS.am-ի թղթակցի հետ զրույցում հայտարարել է քաղաքագետ Սուրեն Զոլյանը։
Նա նշել է, որ այս տրամաբանության մեջ են տեղավորվում Հայաստանի իշխանությունների՝ Արցախին առնչվող հայտարարություններն ու գործողությունները. Փաշինյանը հետևողականորեն կրկնում է ադրբեջանցի պաշտոնյաների թեզերը:
Նրա կարծիքով՝ Հայաստանի քաղաքականությունը սխալ հիմքի վրա է տարվում:
«Առաջին սխալ հիմքն այն է, թե իբր կարելի է ինչ-որ բան սկսել զրոյից: Դա խոսում է պատմության ժխտման մասին: Հիմա հայտարարելով, թե Հայաստանի երրորդ Հանրապետությունը սխալմունք էր, ու մենք զրոյից պետություն ենք ստեղծում, մոլորություն է։
Երկրորդ կարևոր կետն այն է, որ պետական սահմաններն անընդհատ փոխվում են, «կադաստրի թուղթ» հասկացություն գոյություն չունի։ Սահմանները որոշվում են ուժերի հարաբերակցությամբ։ Սիրիան ունի կադաստրի թուղթ, բայց չունի հստակ սահմաններ:
Երրորդ կարևոր թեզը՝ արդյոք Ալիևը պե՞տք է խաղաղություն: Նրան թշնամու կերպար է պետք»,- հավելել է Զոլյանը։
Ըստ Զոլյանի՝ Հայաստանի ներկա իշխանություններն ապահովում են Ադրբեջանի ներքին կայունությունը, քանի որ նրանց առկայությունն ապահովում է, որ Ադրբեջանի ամբողջ բնակչությունը կենտրոնացած է արտաքին թշնամու կերպարի վրա։
«Հայաստանի անկախություն ձեռք բերելու իմաստը Արցախի հարցը լուծելն ու Հայոց ցեղասպանությունը ճանաչելն էր, ոչ թե հարկեր վճարելը կամ լավ ապրելը»,- նշել է քաղաքագետը։
Զոլյանն ընդգծեց, որ Հայաստանի շահերը համընկնում են Իրանի և որոշ չափով Չինաստանի շահերի հետ։
