նախընտրելի դարձնելԸնդդիմությունը, ինչպես կառավարությունը, պատրաստվում է ընտրություններին, ինչով էլ պայմանավորված են նրանց այսօրվա գործողությունները։ Դրա մասին մայիսի 8-ին NEWS.am-ի թղթակցի հետ հարցազրույցում նշել է քաղաքական վերլուծաբան Արգիշտի Կիվիրյանը։
«Ես ներկայիս ընդդիմության մեջ չեմ տեսնում այնպիսի ծրագիր, որը կհանգեցներ Փաշինյանի հեռանալուն։ Այդ ֆոնին ընդդիմադիր ուժերը պայքարում են միմյանց դեմ՝ որոշելու համար, թե ով կլինի ընդդիմադիր թիվ 1 ուժը։
Վարչապետին անվստահության քվեարկություն մտցնելու համար պետք է լինեն համապատասխան պայթյունավտանգ ներքաղաքական պայմաններ, որոնց դեպքում իշխանությունների շարքերում առնետավազք կսկսվի։ Բայց այսօր ես իշխող ուժի փլուզման նույնիսկ ակնարկ չեմ տեսնում։ Ներկայիս գործընթացը ձեռնտու է Փաշինյանին։ Հնարավոր է՝ երեկվա իր պահվածքով նա ցանկանում էր ընդդիմությանը հրահրել գնալ անվստահության քվեարկություն մտցնելու ճանապարհով՝ իր ընդդիմախոսների հերթական ձախողումը ցույց տալու համար»,-հավելել է նա։ Ըստ վերլուծաբանի՝ այս պահին «Հայաստան» դաշինքի ներկայացրած ընդդիմադիր ուժը հասկանում է, որ իրեն հետևող ուժը փորձում է իրենից առաջ անցնել և դառնալ ընդդիմության առաջնորդը։
«Ընդ որում, Սերժ Սարգսյանը հասկանում է, որ իր նկատմամբ հանրային վստահությունը զրոյին մոտ է, և իր ղեկավարած ուժը խորհրդարան է մտել միայն օրենքի ուժով։ Ես չեմ կարծում, թե այսօր վարկանիշի առումով որևէ բան է փոխվել։ Ահա թե ինչու Սերժ Սարգսյանն ուզում է ընդդիմադիր դաշտը մաքրել մնացած բոլոր ուժերից, որպեսզի մնա միայն իր ուժը։
Երբ Սերժ Սարգսյանն ասում է, որ պարտվել է ոչ թե Փաշինյանին, այլ ավելի հզոր ուժերին, ինչո՞ւ անուններ չի նշում։ Ինչո՞ւ չի ասում, թե կոնկրետ ինչ է ձեռնարկել այդ ուժերի երկիր ներխուժումը կանխելու համար, երբ տարբեր բարձրաստիճան պաշտոններ էր զբաղեցնում։
Ի՞նչ կարգավիճակով է պետությունը Փաշինյանին ապահովել անվտանգությամբ և հատուկ պաշտպանիչ միջոցներով Սերժ Սարգսյանի նախագահության ընթացքում։ Սարգսյանի ընտանիքն ինքն էլ խոստովանեց, որ հենց իրենք են աճեցրել Փաշինյանին։ Ես ասում եմ հայտնի բաներ»,-ընդգծել է Կիվիրյանը։
Նա պարզաբանել է, որ իշխանափոխությունը հնարավոր է միայն այն երկրում, որտեղ իշխող ուժի տեղեկատվական և ուժային բլոկները փլուզվում են, դա վերաբերում է ցանկացած երկրի։
«2018 թվականին Հայաստանի լրատվամիջոցների 99,9%-ը գտնվում էր Սերժ Սարգսյանի և նրա ընտանիքի վերահսկողության տակ։ Ուժային բլոկում ևւս ոչինչ չի փլուզվել։
Սերժ Սարգսյանի՝ Հայաստանի նախագահի պաշտոնից հեռանալուց հետո, Փաշինյանը կարողացավ դառնալ վարչապետ՝ շնորհիվ Հայաստանի Հանրապետական կուսակցության ձայների։ Չէ՞որ նրանք կարող էին չքվեարկել նրա օգտին, և Փաշինյանը երբեք կառավարության ղեկավար չէր դառնա։
Երբ Փաշինյանը լուծարեց խորհրդարանը, ՀՀԿ-ն վարչապետի պաշտոնի համար կարող էր առաջադրել միայն իր թեկնածուին, նման դեպքում Փաշինյանը ևս կառավարության ղեկավար չէր դառնա»,-եզրափակել է վերլուծաբանը։
