ՆախընտրելիՊետական բյուջեն միայն թվեր չէ, այլ նաեւ յուրաքանչյուր քաղաքացու մասնակցությունն է իր պետության կառուցմանը։ Այս մասին հունիսի 17-ին Ազգային ժողովի նիստում, ՀՀ 2024թ. պետական բյուջեի կատարման հաշվետվության քննարկման ժամանակ, հայտնել էց ֆինանսների նախարար Վահե Հովհաննիսյանը՝ անդրադառնալով հարկային մշակույթի, պետության կենսունակության, ստվերային տնտեսության հետեւանքների եւ արդար հարկային համակարգի անհրաժեշտության հարցերին։
«Մենք բոլորս, առանց բացառության, մասնակից ենք պետական բյուջեի ձեւավորմանը։ Հայաստանի Հանրապետությունում բյուջեի ձեւավորումը բոլորի պարտականությունն է։ Հայաստանի Հանրապետությունում չկա մի մարդ, ով հարկեր չի վճարում։ «Հակառակը պարզապես անհնար է»,- վստահեցրել է Հովհաննիսյանը՝ «խոհեմաբար մոռանալով» իշխող կուսակցության գերազանցապես գավառական ընտրազանգվածի մասին, որի մեծամասնությունը պաշտոնապես ոչ մի տեղ չի աշխատում՝ թվարկված լինելով բնակչության այսպես կոչված սոցիալապես անապահով շերտում։
Նախարարը հատկապես ընդգծել է, որ հարկերից խուսափելը այլեւս չպետք է ընկալվի որպես ինչ-որ խորամանկություն։ «Սա մեծ թերություն է։ Չափազանց մեծ թերություն, որը թուլացնում է պետության հիմքերը՝ թույլ չտալով, որ այն շարժվի այնպիսի ուղղությամբ, որը կապահովի կայունության առաջնահերթությունը»,- ասել է կառավարության ներկայացուցիչը։
