ՆախընտրելիՄինչ Հայաստանի խորհրդարանում 2024թ. պետական բյուջեի քննարկումների ժամանակ սպառնալիքներ են հնչում Հայ Առաքելական եկեղեցու, քաղաքական ուժերի, տարբեր հասարակական գործիչների, գործարարների եւ «Հայաստանի էլեկտրական ցանցերի» շարքային աշխատակիցների հասցեին, մեր շուրջ ձեւավորված աշխարհաքաղաքական ճգնաժամը շարունակում է խորանալ։ Այս մասին հունիսի 19-ին Ազգային ժողովի նիստում հայտնել է «Հայաստան» ընդդիմադիր խմբակցության պատգամավոր Էլինար Վարդանյանը։
«Եվ այստեղ առաջանում է ադեկվատության հարցը։ Իսկապես չեք տեսնո՞ւմ, թե ինչ է կատարվում մեր շուրջը։ Իսկապե՞ս ադեկվատ եք, երբ դուրս եք գալիս եւ Ազգային ժողովի ամբիոնից խոսում եք ազգայնացման մասին։ Ես կասկած չունեմ, որ դուք դա կանեք։ Դուք կխլեք... Եթե հարկ լինի, դուք ազգայնացնելու եք այն գործարարների ունեցվածքը, ովքեր այժմ ձեր շարքերում են։ Այն գործարարների, ովքեր գրեթե օրը մեջ սուպերմարկետներ են բացում»,- ասել է Վարդանյանը։
Պատգամավորի կարծիքով՝ իշխանությունները իրենց կարճատես քայլերով լրջորեն խաթարում են Հայաստանում իրականացվող եւ ապագա ներդրումները, որոնք վերջին տարիներին արդեն զգալիորեն նվազել են։
«Ցանկացած ներդրողի համար կան մի քանի չափանիշներ։ Դրանք են կայունությունը, կանխատեսելիությունը եւ հուսալի իրավական համակարգը։ Այժմ յուրաքանչյուր ներդրողի համար կանխատեսելի է միայն մեկ բան՝ որ այս երկրում կանխատեսելի եւ կայուն ոչինչ չկա։ Հիմա, ինչպե՞ս կանվանեիք այն մարդուն, ով որոշում է ներդրում կատարել Հայաստանում՝ արկածախնդի՞ր, թե՞ կարճատես մարդ»,- ընդգծել է ընդդիմադիր գործիչը։
