Best Western Hotels–ը ընդլայնում է ներկայությունը Հայաստանում՝ համագործակցելով New City Projects-ի հետ։ Համաշխարհային հյուրանոցային ցանցը հետաքրքրված է Հայաստանի զբոսաշրջային ներուժով և տեսնում է երկարաժամկետ համագործակցության լայն հնարավորություններ։ Դեկտեմբերի 10–ին Best Western Hotels միջազգային հյուրանոցային ցանցի Եվրոպայի, Մերձավոր Արևելքի և Աֆրիկայի զարգացման գծով տնօրեն Ստեֆան Դուբբելինգը և New City Projects-ի գլխավոր տնօրեն Վահե Դավթյանը ստորագրել են համագործակցության պայմանագիր, որով Ծաղկաձորի սրտում կառուցվող պրեմիում դասի Pallada համալիրի կառավարման, բրենդավորման ու միջազգային շուկաներում ճանաչելության բարձրացման գործում իր մասնակցությունը կունենա Best Western Hotels–ը։

Ծաղկաձորի կենտրոնական Ծաղկունյաց հրապարակի հարևանությամբ կառուցվող Pallada-ն տարածաշրջանում իր տեսակի մեջ եզակի նախագիծ է։ Այն միավորում է բնակելի միջավայրի հարմարավետությունն ու հյուրանոցային բարձրակարգ սպասարկումը՝ առաջարկելով ամբողջ տարվա ակտիվ հանգստի, ժամանցի և առողջարար կյանքի հնարավորություններ։ Համալիրը բաղկացած է լինելու 8 մասնաշենքից, որտեղ բնակարանները միավորում են բնակելի ֆունկցիոնալությունը և հյուրանոցային սենյակին բնորոշ սպասարկման բարձր ստանդարտները։