ՆախընտրելիԱյսօր դրված է Հայաստանի պետականության հարցը, որը անանուն, անդեմ մի տարածքի վերածվելու ռիսկի տակ է, որը կարող է և կոչվելու է Հայաստան, բայց որը կտրված կլինի իր արմատներից։ Այս մասին «NEWS.am»-ի թղթակցի հետ զրույցում հայտարարել է «Ժառանգություն» կուսակցության առաջնորդ, անկախ Հայաստանի առաջին արտգործնախարար Րաֆֆի Հովհաննիսյանը։
Նրա գնահատմամբ՝ Հայ Առաքելական Եկեղեցու շուրջ տեղի ունեցող գործընթացների հետ կապված արտաքին ուժերի ուղղորդումն ու աջակցությունն ակնհայտ են, սակայն սա միակ գործոնը չէ, քանի որ երկրի ներսում կան խամաճիկներ, որոնք պատրաստ են ամեն ինչի՝ իշխանությունը պահպանելու համար։ Հովհաննիսյանը շեշտել է, որ այս գործընթացներում արտաքին ուժերի հետքերը ակնհայտ են՝ մատնանշելով Թուրքիան և Ադրբեջանը և գուցե նաև այլ ուժեր, սակայն հիմնական պատասխանատուն գործող կառավարության ղեկավարն է, որը նրա խոսքով ձգտում է շահագործել պարտությունն ու կապիտուլյացիան, նպատակ ունենալով ոչնչացնել հայկական ինքնության հետ կապված ամեն ինչ։
Քաղաքական գործիչը նկատել է, որ եկեղեցուն քննադատում են նրանք, ովքեր դրա իրավունքը չունեն, քանի որ չեն կարողանում լուծել նույնիսկ այն խնդիրները, որոնք գտնվում են իրենց իրավասության ներքո։ Նա հույս է հայտնել, որ այն 10 եպիսկոպոսները, որոնք հանդես են եկել Ամենայն հայոց կաթողիկոսի դեմ, կխելամտանան և կվերադառնան իրենց առաքելությանը՝ որպես Հայ առաքելական եկեղեցու հետևորդներ։
Նրա համոզմամբ՝ Լեռնային Ղարաբաղը, որը հազարամյակներ շարունակ եղել է հայկական, հանձնվել է իշխանությունների մասնակցությամբ՝ հայկական պետության առկայության պայմաններում։
Կուսակցության ղեկավարը նկատել է, որ Սփյուռքը բավականին զուսպ է արձագանքում Հայաստանում և նրա շուրջ տեղի ունեցող գործընթացներին։ Նա պարզաբանել է, որ այսօր չկա միասնական Սփյուռք. այն ունի տարբեր չափումներ, տարբեր շերտեր, որոնց մի մասն իրեն պասիվ է պահում՝ պատճառաբանելով, թե չի ցանկանում զբաղվել քաղաքականությամբ, թեև սա արդեն քաղաքականություն չէ, այլ էկզիստենցիալ խնդիր՝ անկախ նրանից, թե յուրաքանչյուրն ինչպիսի անձնական վերաբերմունք ունի այս կամ այն հոգևորականի նկատմամբ։
Րաֆֆի Հովհաննիսյանը նշել է, որ անցյալ կիրակի այցելել է Մայր Աթոռ՝ Ամենայն հայոց կաթողիկոսին և հայ ժողովրդի իրավունքներն ու ինքնությունը, ինչպես նաև եկեղեցու անկախությունը կառավարությունից պաշտպանելու պայքարին աջակցելու համար։ Ընդդիմադիր գործիչը հավելել է, որ եթե ՀՀ վարչապետ Նիկոլ Փաշինյանը հաջորդ կիրակի գնա Մայր Աթոռ, ապա ինքը նույնպես կգնա այնտեղ՝ կաթողիկոսին աջակցելու համար։
