նախընտրելի դարձնելԵրեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր` մարտի 13-ին, պետք է կայանար Ճանապարհային ոստիկանության նախկին պետ, գնդապետ Մարգար Օհանյանի գործով դատաքննությունը: Սակայն դատն սկսվելուն պես, պարզվեց, որ Մարգար Օհանյանի փաստաբան Մկրտիչ Վասակյանը չի ներկայացել դատաքննությանը: Նա բժշկի տեղեկանք էր ներկայացրել դատավոր Մխիթար Պապոյանին, որ չի կարող մասնակցել դատավարությանը եւ խնդրել էր հետաձգել դատական նիստը:
Դատավոր Մխիթար Պապոյանը հարգելի համարեց Մկրտիչ Վասակյանի բացակայությունը եւ նշեց, որ հաջորդ դատական նիստը կկայանա մարտի 15-ին:
Հիշեցնենք, որ այս գործով նախորդ` մարտի 1-ի դատական նիստը եւս հետաձգվել էր ամբաստանյալ Ստեփան Կարախանյանի փաստաբան Լիանա Գրիգորյանի բացակայության պատճառով:
Նշենք, որ Մարգար Օհանյանը մեղադրվում է պաշտոնեական դիրքը չարաշահելու եւ պետական գույքի առանձնապես խոշոր չափերով հափշտակություն կատարելու համար եւ նրան մեղադրանք է առաջադրվել ՀՀ քր. օր-ի 308-րդ հոդվածի 2-րդ մասի եւ 179-րդ հոդվածի 3-րդ մասի 1-ին կետի հատիկանիշներով:
Ըստ այդմ, 2009 թվականի հունվարից մինչեւ 2011թ. հուլիսն ընկած ժամանակահատվածում ոստիկանության ՃՈ տրանսպորտային միջոցների շահագործման համար ՀՀ պետական բյուջեի եւ ՃՈ արտաբյուջետային միջոցների հաշվին ձեռք է բերվել եւ ՃՈ 1-ին եւ 2-րդ սպայական գումարտակներին բաշխելու համար Օհանյանին է հատկացվել 2 480 720 լիտր բենզին:
Ըստ մեղադրանքի, Մարգար Օհանյանը յուրացրել է Ճանապարհային ոստիկանությանը հատկացրած 574 հազար 420 լիտր բենզինը` կտրոնների տեսքով, դրանով հասցնելով պետությանը 160 միլիոն դրամի (շուրջ 420 հազար դոլար) չափով վնաս:
Գործով որպես ամբաստանյալ անցնում են նաեւ Ստեփան Կարախանյանը, Արա Լեւոնյանը եւ Սամվել Մախմուրյանը:
Լուսանկարը` Սոնա Բարսեղյանի
