Սահմանազատումը Տավուշից սկսել ենք անվտանգության երաշխիք ստեղծելու համար: Այս մասին այսօր՝ մայիսի 7-ին, մամուլի ասուլիսի ժամանակ նշեց ՀՀ վարչապետ Նիկոլ Փաշինյանը:
«Երբ սահմանազատման այս գործընթացը բնականոն ճանապարհով գնա, ավարտվի, հասնի իր լրումին, դա ինքնին լինելու է անվտանգության երաշխիք: Մենք գնացել ենք դրան պատերազմը դելիգիտիմացնելու համար, պատերազմը որեւէ հիմքից զրկելու համար»,-ասաց նա:
Փաշինյանը հայտարարեց, որ եթե սահմանազատումն այլ տարածքից սկսվեր, պատերազմը չէր դելեգիտիմանա. «Պատճառը շատ պարզ է, այս դեպքում խոսվում է բնակատեղիների մասին: Սա շատ կարեւոր նրբություն է: 2021, 2022 թվականների էսկալացիաները միջազգային հանրության շրջանում հարցեր են առաջացրել: Ցավով պետք է արձանագրեմ, որ դրանք միջազգային հարթակներում շատ դեպքերում բացատրվել են ադրբեջանական չորս գյուղերի գործոնով: Այդ իրավիճակներում մենք հայտնվել ենք պատասխանողի դերում»,- ընդգծեց Նիկոլ Փաշինյանը:
