Վրացական հասարակական կազմակերպությունները պատրաստվում են շաբաթ օրը՝ մայիսի 11-ին, բողոքի մեծ ակցիա անցկացնել «օտարերկրյա գործակալների» մասին օրենքի ընդունման դեմ, որը կարող է դառնալ ամենամեծերից մեկը բողոքներն սկսվելուց հետո։

Թբիլիսիում շաբաթ օրը նախատեսված «Եվրոպական քայլերթը» պետք է դառնա երկրի ողջ տարածքում՝ Թելավիում, Բորժոմում, Գորիում, Քութաիսում, Զուգդիդիում, Բաթումում ամբողջ շաբաթվա ընթացքում կազմակերպված բողոքի փոքր ակցիաների գագաթնակետը։

Երթը Թբիլիսիում կսկսվի երեք առանձին վայրերից, որտեղից ժամը 19.00-ին ընդվզողները կշարժվեն դեպի Եվրոպայի հրապարակի հավաքատեղի։

Վրաստանի խորհրդարանը նախատեսում է վերադառնալ երկու ընթերցմամբ ընդունված «Օտարերկրյա ազդեցության թափանցիկության մասին» նախագծի քննարկմանը մայիսի 13-ին, իսկ վերջնական քվեարկությունը նախատեսում են մայիսի 17-ին։ Այդ օրը Վրաստանում նշում են Ընտանիքի սրբության օրը, ինչի հետ կապված տեղի են ունենալու հավատացյալների ցույցեր։