Ոստիկանական մեծ թվով զորքեր Երևանի կենտրոն բերելով՝ հասարակական կարգն ենք պահում։ Այս մասին NEWS.am-ի հարցին ի պատասխան ասաց Պարեկային ծառայության պետ Արթուր Խուդինյանը։

Նշենք, որ Տավուշի թեմի առաջնորդ Բագրատ Սրբազանը իր համակիրների հետ հավաքվում է Օպերայի մոտ, նախատեսված է բողոքի ակցիա այդ հատվածում: Օպերային հարակից հատվածներում ոստիկանական մեծաթիվ ուժեր են կենտրոնացված: Մետաղյա արգելապատնեշներով փակվել են Օպերայի շենքը շրջապատող փողոցների մայթերը:

Արգելապատնեշներով շրջափակված է նաեւ Ազատության հրապարակը, որտեղ սպասվող միջոցառման շրջանակներում վրաններ եւ սեղաններ են տեղադրված: Քաղաքացիները ստիպված են շրջանցել արգելապատնեշները: