Կիրանց գյուղ տանող ճանապարհից բերման է ենթարկվել 14 քաղաքացի: Այս մասին NEWS.am-ին հայտնեց ՆԳՆ մամուլի խոսնակ Նարեկ Սարգսյանը:
Ավելի վաղ հայտնել էինք, որ Կիրանց գյուղ տանող ճանապարհին իրավիճակը լարված է։ Կարմիր բերետավորները բռնի ուժով բերման են ենթարկել քաղաքացիներին։
Հիշեցնենք, որ ոստիկանները շարունակում են երկու կողմից փակ պահել Կիրանց տանող ճանապարհը:
Իրավիճակը փակ ճանապարհին պարբերաբար լարվում է, պատգամավորների և լրագրողների մուտքը ոստիկաններն արգելում են՝ նշելով, թե գյուղում գործողություններ են կատարվում։
Ավելի վաղ հայտնել էինք, որ Կիրանցի հատվածում սահմանազատման աշխատանքները արդեն իսկ մոտենում են ավարտին։ Սահմանազատված հատվածում սահմանը վերահսկողության տակ են վերցնում հայկական սահմանապահ ուժերը: Գործընթացը իրականացնելու համար ժամանակավորապես փակվում է Կիրանցի մուտքը։ Գիշերը երեք սյուն է դրվել, կողքին սահմանապահներն են՝ զինված ու դիմակավորված:
