Լեհաստանի վարչապետ Դոնալդ Տուսկը, ըստ Reuters-ի՝ երեքշաբթի հայտարարել է, որ Եվրոպան պետք է բարելավի իր պաշտպանունակությունը սեփական անվտանգության համար և կրկնել է իր կոչը՝ ստեղծելու միասնական եվրոպական հակաօդային պաշտպանության համակարգ:
Ուկրաինայի հակամարտության համատեքստում Լեհաստանն ուժեղացնում է իր պաշտպանունակությունը՝ այդ նպատակով հատկացնելով համախառն ներքին արդյունքի ավելի քան 4%-ը։
Տուսկը ելույթ ունենալով Կատովիցեում՝ Եվրոպական տնտեսական կոնգրեսում՝ քաղաքական գործիչների և գործարարների առաջ, հայտարարել է, որ ԵՄ երկրները պետք է համատեղ գործողություններ ձեռնարկեն՝ պաշտպանական ծախսերն առնվազն 100 միլիարդ եվրոյով ավելացնելու համար: Նա շեշտել է, որ Եվրոպան պետք է պատրաստ լինի առաջիկա ամիսների, ինչպես նաև հաջորդ հինգ տարիների ընթացքում մի իրավիճակի, երբ աշխարհում ոչ մի ուժ չհամարձակվի ձեռք բարձրացնել ԵՄ-ի վրա: «Մեծ փողերը երկար ժամանակ, գուցե ընդմիշտ, կհեռացնեն պատերազմը Եվրոպայի սահմաններից»,-ընդգծել է Տուսկը:
Նա նշել է նաև, որ համատեղ հակաօդային պաշտպանությունը պետք է դառնա եվրոպական նախագիծ, որը ֆինանսական ջանքեր կներկայացնի Եվրոպայի վրա պաշտպանական գմբեթ կառուցելու համար:
Համագումարին մասնակցած Եվրահանձնաժողովի նախագահ Ուրսուլա ֆոն դեր Լայենը նույնպես ասել է, որ Եվրոպան պետք է ավելի շատ ծախսի պաշտպանության վրա և հայտարարեց, որ եթե ինքը մնա իր պաշտոնում ևս մեկ ժամկետ, պաշտպանական նոր նախագծեր կառաջարկի։ Ֆոն դեր Լայենը առաջ է մղել Եվրոպայի պաշտպանական արդյունաբերությանը աջակցելու կոչված ԵՄ պաշտպանության հանձնակատարի հաստիք ստեղծելու ավելի վաղ արված առաջարկը:
