ԱՄՆ իշխանություններն անցած շաբաթ դադարեցրել են 3,5 հազար ավիառումբերի մատակարարումն Իսրայել այն մտավախությունների ֆոնին, որ դրանք կարող են օգտագործվել Գազայի հատվածում, Ռաֆահ քաղաքում ռազմական գործողության ժամանակ։ Այս մասին տեղեկացրել է CNN հեռուստաընկերությունը՝ հղում կատարելով ամերիկյան վարչակազմում ունեցած աղբյուրին։
Նրա տվյալներով՝ խոսքը 2 հազար ֆունտ (907 կիլոգրամ) քաշ ունեցող 1,8 հազար ռումբերի, ինչպես նաեւ 500 ֆունտ (մոտ 227 կիլոգրամ) քաշ ունեցող 1,7 հազար ռումբերի մատակարարումը դադարեցնելու մասին է։ «Մենք հատկապես կենտրոնացել ենք 2 հազար ֆունտ քաշ ունեցող ռումբերի կիրառման հարցի վրա՝ այն ազդեցության հետ կապված, որը նրանք կարող են ունենալ խիտ բնակեցված քաղաքային շրջաններում, ինչպես տեսանք Գազայի այլ հատվածներում»,- CNN-ին ասել է անունը չնշած պաշտոնյան։
Ինչպես նշել է The New York Times թերթը՝ հղում կատարելով ամերիկյան վարչակազմի պաշտոնյաներին, ԱՄՆ նախագահ Ջո Բայդենը օգտվել է զենքի առաքման դադարեցումից որպես հրեական պետության քաղաքականության վրա ճնշում բանեցնելու գործիք։ Նշվել է, որ այդ միջոցը դարձել է«ԱՄՆ-ի եւ Իսրայելի միջեւ խորացող պառակտման նշան այն իմաստով, թե ինչ միջոցներով է վարվում պատերազմը»։ Պարբերականը գրել է, որ ԱՄՆ վարչակազմը դիտարկում է հարցը, թե արժե արդյոք դադարեցնել ապագա մատակարարումները, այդ թվում ուղղորդող համալիրների, որոնք թույլ են տալիս սովորական ռումբերը վերածել գերճշգրիտ զենքի։