Արզական համայնքում բնակվում է շուրջ 100 արցախցի եւ մենք եկել ենք մեր աջակցությունը ցուցաբերելու «Տավուշը հանուն հայրենիքի» շարժմանը: Այս մասին լրագրողների հետ զրույցում նշեց արցախցի տղամարդը:
«Արզականի արցախցիներս պատրաստակամ ենք վաղը մասնակցելու Երեւանում կայանալիք մեծ միջոցառումներին, որ պլանավորված է: Ես ուզում եմ կոչով դիմել Արցախի Հանրապետության իշխանություններին, հատկապես Սամվել Շահրամանյանին, որի հետ մի քանի հանդիպումների ժամանակ խոստացել է կազմակերպի ընդհանուր արցախահայության միասնական պայքարը, բայց ոչինչ չի արվում: Հարգարժան Սամվել Շահրամանյան, այսօր ժամն է, որ դուք ներկայանաք, մեր Բագրատ Սրբազանի աջը համբուրեք եւ միավորեք ամբողջ Հայաստանով մեծ ցրված արցախահայությանը, որպեսզի ակտիվ մասնակցություն ունենան այս շարժմանը»,-ասաց արցախցի տղամարդը:
Նա հայտարարեց, որ «այս դավաճան իշխանությունների օրոք ոչինչ չի ստացվելու». «Արցախի վերադարձը լինելու է նոր, ազգային իշխանությունների օրոք: Այն, ինչին այսօր հասել ենք դավաճան Նիկոլի աշխատանքի արդյունքն է: Երբ իր լեզվով ինքն առաջին անգամ Պրագայում հայտարարել է, որ Արցախը Ադրբեջանի մաս է ճանաչում, այդ լեզուն պետք է կտրվի: Նիկոլ Փաշինյանը նպաստել է արցախցիների ցեղասպանությանը, նա պետք է պատասխան տա դրա համար: Ամոթ է մեզ, որ Հայաստանում մեզ ընդամենը վերաբնակիչների, փախստականների կարգավիճակ է տալիս: Կոչ եմ անում բոլոր արցախցիներին վաղը մեկ մարդու պես հավաքվել Երեւանում: Պահն է եկել, որ ազատվենք այս դավաճաններից, ազգադավներից, որոնք տարածում են, թե պատերազմ է լինելու: Պատերազմի հրձիգները դուք եք:
Նիկոլ, լսիր, տես ինչ եմ ասում քեզ, եթե դու դիմես բռնության ժողովրդի հանդեպ, հանցանքդ ավելի շատ է լինելու: Վահե Ղազարյան, եթե ուժ կիրառես ժողովրդի հանդեպ, մեղքերդ ավելի են շատանալու: Ոստիկանությունն ու ԱԱԾ-ն պետք է ձերբակալեն այդ դավաճանին»,-ասաց նա: