Իսրայելի պաշտոնյաները վախենում են, որ Գազայի հատվածում հրեական պետության գործողությունների վերաբերյալ ԱՄՆ վարչակազմի առաջիկա զեկույցը կարող է դրդել նախագահ Ջո Բայդենին սահմանափակել ռազմական օգնությունը երկրին: Այս մասին հայտնում է CNN-ը՝ վկայակոչելով ԱՄՆ Կոնգրեսի աղբյուրները։

Հեռուստաալիքի զրուցակիցների խոսքով՝ Իսրայելի իշխանությունների ներկայացուցիչները սերտ կապի մեջ են զեկույցը կազմող ամերիկյան վարչակազմի հետ։ Եթե ​​զեկույցը պարզի, որ Իսրայելը չի ​​հետեւում միջազգային իրավունքին, «դա, ամենայն հավանականությամբ, աղմուկ կբարձրացնի վարչապետ Բենիամին Նեթանյահուի կառավարությունում», - նշում է հեռուստաալիքը:

Նրա տեղեկություններով՝ զեկույցը չի պարտավորեցնում ԱՄՆ վարչակազմին փոխել քաղաքականությունը Իսրայելի նկատմամբ, սակայն «այն կարող է օգտագործվել նման փոփոխություն հրահրելու համար»։ Արդյունքում ԱՄՆ-ը կարող է պայմաններ դնել, որոնց հիման վրա օգնություն կտրամադրվի Իսրայելին։

Հեռուստաալիքը նշում է, որ Գազայի հատվածում Իսրայելի գործողության ընթացքում միջազգային մարդասիրական իրավունքի հնարավոր խախտման վերաբերյալ ԱՄՆ կառավարության զեկույցի պատրաստումը հակասություններ է առաջացրել ամերիկյան վարչակազմում, հատկապես՝ Պետդեպարտամենտում։

CNN-ի Կոնգրեսի աղբյուրների համաձայն՝ զեկույցի պատրաստմանը ներգրավված են Պետդեպարտամենտի քաղաքական-ռազմական հարցերի բյուրոն, գերատեսչության այլ ստորաբաժանումներ, ինչպես նաև Պենտագոնը և Սպիտակ տան Ազգային անվտանգության խորհուրդը։