Սենեգալի մայրաքաղաք Դաքարի օդանավակայանում Boeing 737 ինքնաթիռը, որում եղել է 85 մարդ, դուրս է եկել թռիչքուղուց, ինչի հետևանքով տուժել է 10 մարդ, հայտնում է AP-ն։
Տրանսպորտի նախարար Էլ Մալիկ Նդիայեն ասել է, որ TransAir ինքնաթիռը, որն իրականացնում էր Air Sénégal չվերթը, չորեքշաբթի ուշ երեկոյան 79 ուղևորներով, երկու օդաչուներով և չորս բորտուղեկցորդներով մեկնում էր դեպի Բամակո՝ հարևան Մալիում:
Aviation Safety Network կազմակերպությունը, որը վերահսկում է ինքնաթիռների վթարները, իր X միկրոբլոգում հրապարակել է վնասված ինքնաթիռի լուսանկարները։ Դատելով լուսանկարներից՝ շարժիչներից մեկը քանդվել է, վնասվել է նաև թևը։
