Վաղվանից` առավոտյան ժամը 10։00-ից, բոլոր հնարավոր վայրերում անցկացնելու ենք խաղաղ անհնազանդության ակցիաներ: Այս մասին հայտարարեց Բագրատ Սրբազանը:

«Դիմում եմ բոլոր ուսանողությանը, բուհերին, բոլոր այն գործարարներին, որոնց համար փողը գերագույն արժեք չէ, որոնց դուք եք պահում, ժողովուրդ ջան, եւ բոլորին, բոլորին, մնացած ուսումնական հաստատություններին՝ դասադուլ անելու։ Առանց որեւէ ագրեսիայի, որեւէ բանի, մի քանի օր ընդամենը, երկու-երեք օր, ավելի չէ։ Մարզերի մեր ժողովրդին, այս գիշեր հետ գնացեք, այնտեղ եւս գործողությունների շարք սկսեք եւ ամբողջ հանրապետության տարածքում պետք ա էդ ճնշումը լինի: Մարդիկ ուզում են, որ այդ ճանապարհով լինի, պետությունը ցնցումների մեջ գցեն, ուրիշ ճանապարհ չեք թողնում»,- ասաց նա:

Բագրատ Սրբազանը ասել է, որ գործողությունները երկար չեն տեւելու:

«Մի՛ նեղվեք ոչ մի բանից։ Վստահ ասում եմ, վստահ՝ մեր ուզածը լինելու է։ Ես հավես չունեմ ամիսներով փողոցներում պտտվելու, 7-10 օր ամենաշատը։ Առավել ժամանակ չկա։ Ո՛չ մի ամիս, ո՛չ երկու ամիս, ո՛չ 5 ամիս, ո՛չ քայլել, ո՛չ պտտել աջ ու ձախ։ Գործողությունները կանենք, արդյունքը կստանանք։ Ու կանենք միասին»,-ասել է նա։