Բժիշկները հայտնել են մայիսի 15-ին մահափորձի հետեւանքով վիրավորված Ռոբերտ Ֆիցոյի վիճակի բարելավման մասին, տեղեկացրել է Aktuality պարբերականը։
Բանսկա-Բիստրիցայի Ռուզվելտի հիվանդանոցը, որտեղ գտնվում է Սլովակիայի վարչապետը, երկուշաբթի առավոտյան կարճ հայտարարություն է արել Ռոբերտ Ֆիցոյի ընթացիկ վիճակի մասին։
«Այսօրվա խորհրդակցությունից հետո պացիենտի վիճակը գնահատվում է կայուն։ Նրա վիճակը կլինիկական առումով լավանում է, նա շփվում է, բորբոքման ցուցիչները դանդաղ իջնում են։ Վարչապետը մեր հսկողության տակ է մնում»,- հայտնել են բժիշկները։
Վարչապետ Ֆիցոն Ռուզվելտի հիվանդանոցում է չորեքշաբթի օրվանից։ Նրան այնտեղ են հասցրել ուղղաթիռով, այն բանից հետո, երբ նրա վրա մի քանի անգամ կրակել է 71-ամյա տղամարդը։ Մահափորձը տեղի է ունեցել կառավարության արտագնա նիստում, Գանդլովա քաղաքում։
Միջադեպից հետո հայտնի է դարձել, որ մահափորձը սպանության նպատակ ուներ։
Ֆիցոն չորս հրազենային վիրավորում ունի։ Նրան արդեն երկու անգամ վիրահատել են։