Մենք հավատում ենք, որ Հայաստանն ու հայ ժողովուրդը արժեհամակարգով անքակտելիորեն կապված են եվրոպական քաղաքակրթության հետ. Միաժամանակ, ես անընդունելի եմ համարում արտաքին քաղաքական կողմնորոշումները որպես քաղաքական դավանանք: Այս մասին, այսօր՝ մայիսի 1-ին, «Նոր ուժ» կուսակցության հիմնադիր համագումարում իր ելույթում նշեց Երեւանի նախկին քաղաքապետ Հայկ Մարությանը:
«Հայաստանը չի կարող իրեն թույլ տալ հայտնվել աշխարհաքաղաքական կենտրոնների բախման թատերաբեմում: Երկրի ներքին ու արտաքին քաղաքական նպատակները պետք է բխեն սեփական ռեսուրսների իրատեսական գնահատման վրա՝ ջանալով շարունակաբար լայնացնել այդ հնարավորությունների շրջանակը: Մինչդեռ վերջին տարիներին իշխանությունների բազմաթիվ վայրիվերո գործողությունները խարխլել են ՀՀ արտաքին քաղաքան վարկը, կրճատել հնարավորությունների շրջանակը: Հայաստանի հանդեպ թշնամաբար տրամադրված երկրներն օգտվում են այս իրավիճակից՝ անընդհատ նորանոր զիջումներ կորզելով եւ շարունակելով պահանջել վելին, ավելին և ավելին:
Այս խոցելի վիճակից երկիրը կարող է դւորս գալ միայն ճկուն, հավասարակշռված եւ բանիմաց արտաքին քաղաքականության շնորհիվ՝ որդեգրելով «չկան հավերժ բարեկամներ եւ թշնամիներ, կան հավերժ շահեր» հայտնի սկզբունքը:
Մեզ համար առաջնային կարեւորություն ունեն մեր անմիջական հարեւան, բարեկամ երկրների՝ Վրաստանի եւ Իրանի հետ բոլոր տեսակի հարաբերությունների ռազմավարական զարգացումը, ԵՄ-ի եւ եվրոպական երկրների հետ ինտեգրցիոն ծրագրերի լայնացումն ու խորացումը հնարավոր բոլոր ուղղություններով եւ մակարդակներով, ՌԴ-ի հետ բարեկամական հարաբերությունների պահպանումը, քաղաքական, տնեսական ու մշակութային սերտ կապերի ամրապնդումը ԱՄՆ-ի, Հնդկաստանի, Չինաստանի, րաբական աշխարհի բարեկամ երկրների հետ: Նոր կապերի ձեւավորումն ու ամրապնդումը հնարավոր բոլոր տարածաշրջանների ու երկրների հետ, Ադրբեջանի եւ Թուրքիայի հետ արժանապատիվ երկխոսության վերականգնումը, հարաբերությունների կարգավորման եւ խաղաղ գոյակցության ձգտումը»,- հայտարարեց Հայկ Մարությանը:
Նշենք, որ «թավշյա հեղափոխությունից» հետո Հայկ Մարությանը «Քաղաքացիական պայմանագրի» ցուցակով ընտրվել էր Երևանի քաղաքապետ, ապա 2021-ի դեկտեմբերին պաշտոնանկ էր արվել իր թիմի կողմից։ Քաղաքապետին անվստահություն հայտնելու գործընթացն իշխող թիմը հիմնավորել էր նրա հետ քաղաքական խզմամբ։ Այս տարվա փետրվարի 7-ին էլ Երևանի ավագանին դադարեցրել էր «Ազգային առաջընթաց» կուսակցության ցուցակով ավագանու անդամ դարձած Մարությանի լիազորությունները՝ բացակայություների հիմնավորմամբ։
«Նոր ուժ» ռեֆորմիստական կուսակցության նպատակը հանրաքվեներին, պետական և տեղական ինքնակառավարման մարմինների ընտրություններին մասնակցելու և հասարակության ու պետության քաղաքական կյանքին մասնակցության այլ ձևերով ժողովրդի քաղաքական կամքի ձևավորմանն ու արտահայտմանը նպաստելն է:
«Նոր ուժ» կուսակցության գաղափարական հենքը սոցիալ-ռեֆորմիզմն է։
