ԵՄ դիվանագիտության ղեկավար Ժոզեպ Բորելը Եվրամիության պատմության մեջ ամենամեծ ընդլայնման 20-ամյակի կապակցությամբ իր հայտարարության մեջ նշել է, որ ներկայիս թեկնածու երկրները, այդ թվում՝ Ուկրաինան, պատմական հնարավորություն ունեն իրենց ապագան ամուր կապելու ԵՄ-ի հետ։ Այս մասին ասվում է Բորելի՝ չորեքշաբթի հրապարակված հայտարարության մեջ, գրում է European Pravda-ն։
Բորելը նշել է, որ 20 տարի առաջ եվրոպական ընտանիքը ողջունել է տասը նոր անդամ պետությունների, ինչը համարձակ քայլ է, որը էլ ավելի միավորեց Եվրոպան։
«Սակայն մայրցամաքը վերամիավորելու մեր աշխատանքն ավարտված չէ: Մենք դա գիտեինք մինչև 2022 թվականը, և մենք դա ավելի շատ գիտենք այսօր, երբ Ռուսաստանը ագրեսիվ պատերազմ է մղում Ուկրաինայի դեմ»,- ասել է նա։
Բորելի խոսքով, վերջին տարիներին միլիոնավոր եվրոպացիներ ցանկություն ու հույս են հայտնել միանալ ԵՄ նախագծին։
«Արևմտյան Բալկանները, Թուրքիան, Ուկրաինան, Մոլդովան և Վրաստանը պատմական հնարավորություններ ունեն իրենց ապագան Եվրամիության հետ ամուր կապելու համար: ԵՄ ընդլայնումը տրանսֆորմացիոն քաղաքականություն է, որն ամրապնդում է անվտանգությունը, արդարադատությունը և ժողովրդավարությունը, ինչպես նաև բարելավում է եվրոպացիների կենսամակարդակը»,- ասել է Բորելը։
ԵՄ-ն և թեկնածուները համագործակցում են անվտանգության և պաշտպանության ոլորտում՝ համատեղ դիմակայելու և ավելի լավ հաղթահարելու բազմաթիվ աշխարհաքաղաքական մարտահրավերները, հավելել է ԵՄ դիվանագիտության ղեկավարը։
Ապագա անդամ երկրները պետք է ամրապնդեն իրենց ժողովրդավարական ինստիտուտները և պաշտպանեն մարդու իրավունքները և հիմնարար ազատությունները, ընդգծել է Բորելը։
«Թեկնածու երկրները և ԵՄ-ն պատմական հնարավորություն ունեն կառուցելու ավելի մեծ, խորը և ուժեղ Եվրամիություն»,- հայտարարել է ԵՄ բարձր ներկայացուցիչը։