Կոլումբիայի համալսարանում և քաղաքային քոլեջում պաղեստինամետ ցույցերը ճնշելու ժամանակ շուրջ 300 մարդ է ձերբակալվել: Դրա մասին հայտնել է Associated Press-ը։
Նյու Յորքի ոստիկանությունն ավելի վաղ ներխուժել էր Համիլթոն Հոլ՝ Կոլումբիայի համալսարանի գլխավոր մասնաշենք, որը գրավել էին ցուցարար պաղեստինամետ ուսանողները։ Ըստ ABC News-ի՝ ոստիկանները համալսարան են ներխուժել երկրորդ հարկի պատուհանից, որից հետո սկսել են ձերբակալել ակտիվիստներին:
Ապրիլի 30-ի առավոտյան ցուցարարները կոտրել են Համիլթոն Հոլի պատուհաններն ու ներս մտել: «Ամերիկայի ձայն»-ը հայտնել է, որ ցուցարարները համալսարանի դիմաց փողոցային կահույքից պատնեշներ էին տեղադրել։
Վիրջինիայի Տեխնոլոգիական ինստիտուտում 82 ուսանող ավելի վաղ ձերբակալվել էր՝ ցուցարարների ճամբարը ցրելու ընթացքում: Կալիֆորնիայի պոլիտեխնիկական ինստիտուտի տարածքից նույնպես ցրել են պաղեստինամետ ուսանողների։ Այստեղ, ըստ ABC News-ի, ձերբակալվել է 25 մարդ։
Բուհերին՝ Գազայի հատվածի պատերազմում Իսրայելի կամ նրան աջակցող ընկերությունների հետ համագործակցությունը դադարեցնելու կոչեր անող ուսանողական շարժումներ են սկսել ամբողջ երկրով մեկ՝ Նյու Յորքից Տեխաս և մինչև Կալիֆորնիա:
