ՆախընտրելիԵրեւանի Նար-Դոս փողոցի 1-ին նրբանցքի 71 տան բնակչուհի Նինա Վերմիշյանին այսօր՝ սեպտեմբերի 11-ին, կառավարության մոտ փորձեց իր տան հետ կապված խնդիրը ներկայացնել Կապի և տրանսպորտի նախարար Գագիկ Բեգլարյանին, որը չլսեց նրան՝ շտապելով կառավարություն: Կինը վիրավորվեց եւ սկսեց բարձրաձայն արտասվել: «Վիճակս շատ ծանր է, իսկ Բեգլարյանը խնդում ա վրես»,-ասաց տիկին Նինան՝ լաց լինելով։
Կնոջ խոսքով՝ 15 տարի ինքը բոլոր նոր նշանակված թաղապետերին, քաղաքապետերին նամակ է գրել, ներկայացրել խնդիրը, սակայն ոչ մի լուծում չի տրվել:
«Հաշմանդամ մորս կալյասկով տարել եմ Տարոն Մարգարյանի տուն, ոչ մի բան չեն անում: Հիվանդ մերս պառկած է մահամերձ, տունը լրիվ փլված: Տեսա՞ք՝ ծիծաղեց վրաս, անցավ, ասում ա՝ քո տունը շուտվանից է փլված, ինչի՞ Տարոնը քեզ տուն չի տվել»,- NEWS.am-ի հետ զրույցում նախարարի հետ իր զրույցի բովանդակությունը փոխանցեց Նինա Վերմիշյանը։
Տիկին Նինան բողոքեց, որ իշխանությունները ամեն անգամ ընտրությունների ժամանակ 5000 դրամ գումար են տալիս, հետո մոռանում իրենց:
«Բազմահանգուցավոր զոբ ունեմ, մամաս առաջին կարգի հաշմանդամ է, ես՝ երկրորդ կարգի, հայաթից փլված է ամբողջ տունս: Ես Մոսկվա եմ դիմելու, խայտառակ ենք եղել, մորս ծանր թողել, եկել եմ»,- հուզված պատմեց Նինա Վերմիշյանը:
