«Նախախորհրդարանի» անդամ Գեւորգ Սաֆարյանը, որի վրա նոյեմբերի 27-ի երեկոյան հարձակում էին կատարել, արդեն լավ է, այսօր դուրս է գրվել Երեւանի «Սուրբ Գրիգոր Լուսավորիչ» բժշկական կենտրոնից: Գեւորգ Սաֆարյանը NEWS.am-ին պատմեց, որ իր վրա հարձակվել են, երբ ինքը կանգնած է եղել Խանջյան փողոցի կանգառներից մեկում:
«Նախախորհրդարանից դուրս եկա, հասա մինչեւ Խանջյանի կանգառ, որտեղ երեւի արդեն հետեւում էին ինձ: Կանգառում հարձակվեցին, հետեւիցս ինչ-որ բութ գործիքով խփեցին, ես ուշագնաց եղա։ Հետո ես, չգիտեմ ոնց, վերադարձել եմ Նախախորհրդարան, այնտեղ ջուր լցրին երեսիս, սթափվեցի, դրանից հետո «Շտապօգնության» մեքենայով բերեցին հիվանդանոց։ Հարվածից պատռվել էր գլուխս, կար են դրել»,-պատմեց Գեւորգ Սաֆարյանը։
Գեւորգ Սաֆարյանին երեկ երեկոյան հիվանդանոցում այցելել են ոստիկանության աշխատակիցներ, հաղորդում են վերցրել հանցագործության մասին, բայց ինչպես նշեց ակտիվիստը, կասկածում է, թե արդար քննություն կանցկացվի:
«Ակնհայտ է, որ մեր նկատմամբ այս ճնշումներն այս ռեժիմից են, իսկ ոստիկանությունն այդ ռեժիմի մի մասն է: Այնպես որ սպասել, թե ոստիկանությունն ինչ-որ բան պետք է բացահայտի, միամտություն է»,-ասաց նա:
Ըստ Գեւորգ Սաֆարյանի՝ իր նկատմամբ կատարված հարձակումը «Նախախորհրդարանի» անդամների ավտոմեքենաների հրկիզման շարունակությունն է, այդպես ցանկանում են ճնշում գործադրել «Նախախորհրդարանի» վրա. «Ռեժիմն արդեն վտանգ է տեսնում «Նախախորհրդարանի» մեջ, նրա անդամներին ու աջակիցներին փորձում է ահաբեկել»:
Հիշեցնենք, որ նոյեմբերի 26-ի գիշերը անհայտ մարդիկ վնասել էին «Նախախորհրդարանի» անդամներից եւ աջակիցներից 7-ի ավտոմեքենաները: