Գյումրիում Ավետիսյանների ընտանիքի 6 անդամներին այսօր՝ հունվարի 15-ին, հուղարկավորեցին Շիրակի գերեզմանատանը կողք կողքի:
Նշենք, որ Գյումրիի Սուրբ Նշան եկեղեցու մոտ հավաքված՝ Ավետիսյաններին հրաժեշտ տալու եկած հոծ բազմությունը մինչեւ գերեզմանատուն ուղեկցեց մահվան թափորը: Գյումրեցիներից բացի այստեղ էին նաեւ Երեւանի եւ Հայաստանի տարբեր մարզերից ժամանած քաղաքացիներ, Ազգային ժողովի նախագահ Գալուստ Սահակյանը, ՏԿԱԻՆ նախարար Արմեն Երիցյանը, Գլխավոր դատախազ Գեւորգ Կոստանյանը, Շիրակի մարզպետ Ֆելիքս Ցոլակյանը:
Նշենք, որ հուղարկավորության ծախսերը հոգացել է Գյումրիի քաղաքապետարանը:
Գյումրիի քաղաքապետ Սամվել Բալասանյանն այդպես էլ չհասցրեց մասնակցել հուղարկավորությանը: Նրա մամուլի խոսնակ Լիլիթ Մակարյանը NEWS.am-ին ասաց, որ քաղաքապետի օդանավը դեռ չի ժամանել:
Նշենք, որ Բալասանյանը, որը, ըստ պաշտոնական հաղորդագրության, պաշտոնական այցով ԱՄՆ Գլենդել քաղաքում էր, փաստորեն չկարողացավ գյումրեցիների կողքին լինել Գյումրին ու ամբողջ Հայաստանը ցնցած վերջին իրադարձությունների օրերին:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին: Կասկածյալը՝ ռուս զինվորական Վալերի Պավելի Պերմյակովը ձերբակալվեց նույն օրը կեսգիշերին ռուս սահմանապահների կողմից եւ հանձնվեց ռուսական ռազմաբազայի հրամանատարությանը: Ռուսական եւ հայկական կողմի միջեւ ձեռք բերված համաձայնությամբ գործը կքննի ռուսական կողմը: