ՊԲ արեւելյան ուղղությամբ տեղակայված զորամասերից մեկի պահպանության տեղամասի ԼՂՀ մարտական հենակետում մարտի 2-ի լույս 3-ի գիշերը հակառակորդի կողմից ստացած հրազենային վիրավորումից մահացած 20-ամյա Արսեն Կարապետյանը ընտանիքի միակ զավակն էր, ապրում էր մոր հետ: Հարեւանները NEWS.am-ին պատմեցին, որ Արսենն ու մայրը երկու տարի առաջ են դուրս եկել մոր հայրական տնից, որտեղ ապրում էին Արսենի ծնված օրվանից, եւ վարձով էին բնակվում։
«Արսենը միայնակ մոր զավակ է, հայրը ՌԴ-ում է, իրենք երկար տարիներ է՝ ապրում են Արսենի մոր հայրական տանը: Արսենը մեր բակում է մեծացել, խելոք, դաստիարակված, լսող երեխա էր: Մի վատ բան չենք տեսել իրենից, մեծին հարգող, լսող էր: Մեկին մի բան պետք լիներ, պատրաստակամ էր, կօգներ: Կարելի է ասել՝ մի քիչ էլ խեղճ երեխա էր»,- Արսենի մասին պատմեց հարեւանուհի Լիդա Շահվերդյանը՝ նշելով, որ նա դեպքից երկու օր առաջ էր խոսել մոր հետ, ուրախությամբ նշել, որ 100 օր է մնացել զորացրվելուն:
Հարեւանուհին պատմեց, որ Արսենը ցանկացել է ընդունվել բուհ, բայց փոխարենը դպրոցն ավարտելուց հետո աշխատել է, օգնել մորը:
Նշենք, որ ՊԲ օպերատիվ տվյալների համաձայն, մարտի 2-ին եւ լույս 3-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է շուրջ 200 անգամ, որի ընթացքում տարբեր տրամաչափի հրաձգային զինատեսակներից, ինչպես նաեւ 60 մմ ականանետերից ու ՌՊԳ-7 տիպի նռնականետերից հայ դիրքապահների ուղղությամբ արձակվել է ավելի քան 3000 կրակոց:
Խախտումների հետեւանով ՊԲ արեւելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից մահացու հրազենային վիրավորում է ստացել զինծառայող, 20-ամյա Արսեն Աբրեստի Կարապետյանը:
Նախագահ Բակո Սահակյանը մարտի 3-ին ստորագրել է հրամանագիր, համաձայն որի Արսեն Կարապետյանը հետմահու պարգեւատրվել է «Մարտական ծառայություն» մեդալով։