Եվրամիության ծայրահեղ աջ կուսակցությունները կարող են օգտագործել բնակարանային ճգնաժամը սոցիալական լարվածություն հրահրելու համար։ Այս մասին տեղեկացրել է The Guardian թերթը՝ հղում կատարելով ՄԱԿ փորձագետներին։
Նրանց կարծիքով՝ ծայրահեղ աջ կուսակցությունները բարգավաճում են, երբ կարողանում են օգտագործել սոցիալական լարվածությունը ներդրումների պակասի եւ ոչ համարժեք կառավարական պլանավորման պատճառով։ Պարբերականի համաձայն՝ նման իրավիճակ է ստեղծվել ԵՄ շատ երկրներում, իսկ բնակարանային ճգնաժամը ազդում է ոչ միայն ցածր եկամուտներ ունեցող անձանց, միգրանտների եւ ոչ լիարժեք ընտանիքների, այլեւ միջին դասի վրա։
The Guardian-ը հիշեցրել է, որ վերջերս Լիսաբոնում, Ամստերդամում, Պրահայում, Միլանում եւ Լոնդոնում տեղի են ունեցել բողոքի ակցիաներ բնակարանի վարձի աճի պատճառով։ Թերթը կարծիք է հայտնել, որ անշարժ գույքի բարձր գները Եվրախորհրդարանի ընտրությունների շեմին վտանգում են դառնալ կարեւոր քաղաքական մարտադաշտ Եվրոպայում։
Պարբերականն ավելացրել է, որ եվրոպական վիճակագրական գործակալության (Եվրոստատ) տվյալներով՝ 2010-2022թթ. բնակարանի գները ԵՄ 27 երկրներում բարձրացել են 47 տոկոսով, իսկ վարձի արժեքը՝ 18 տոկոսով։ Եվրամիության որոշ երկրներում տնային տնտեսությունների մեկ հինգերորդ մասը բնակարանի վրա ծախսում է իր զուտ եկամուտի նվազագույնը 40 տոկոսը։