ԱԺ ֆինանսավարկային և բյուջետային հարցերի մշտական հանձնաժողովում երկրորդ ընթերցմամբ քննարկվել է «Հաշվեքննիչ պալատի մասին» օրենքում, «Վարչական իրավախախտումների վերաբերյալ» օրենսգրքում և հարակից օրենքներում փոփոխություններ ու լրացումներ առաջարկող օրենսդրական փաթեթը:
Որպես փաթեթի համահեղինակ՝ ԱԺ «Քաղաքացիական պայմանագիր» խմբակցության պատգամավոր Արուսյակ Մանավազյանը «Ֆեյսբուք»-ի իր էջում ներկայացրել է առաջին ընթերցումից հետո առկա առաջարկները:
«Հաշվեքննիչ պալատում ծառայությունը ներդրվում է որպես պետական ծառայության նոր տեսակ, սահմանվում են վերջինիս անցման իրավական կառուցակարգերը: Քաղծառայությունից բացի մասնավոր հատվածից Հայաստանում գործող միջազգային խմբի անդամ հանդիսացող և միջազգային ճանաչում ունեցող աուդիտորներին հաշվեքննությանը ներգրավելու հնարավորություն է տրվելու: Այդ պաշտոնների համար նախատեսվում է համապատասխան աշխատավարձ՝ կարգավորելով վարձատրության առաջարկվող մեխանիզմի իրացման համար անհրաժեշտ հարակից հարաբերությունները: Կսահմանվի, որ Հաշվեքննիչ պալատի՝ իրավաբանական անձանց ստուգման գործառույթը չի տարածվում ՀՀ օրենքով անորոշ թվով հասցեատերերի համար սահմանված հարկային արտոնությունների վրա:
Հաջորդ առաջարկով էլ կսահմանվի, որ Հաշվեքննիչ պալատը ոչ թե Հաշվեքննիչ պալատի սահմանած կարգով, այլ միայն «ՀՀ բյուջետային համակարգի մասին» օրենքով յուրաքանչյուր տարի կկազմի և Կառավարությանը կներկայացնի առաջիկա տարվա իր բյուջետային ֆինանսավորման հայտը (ծախսերի նախահաշվի նախագիծը):
Նախաձեռնությունը բարձրացնելու է հանրային ֆինանսների կառավարման արդյունավետությունը և ԱԺ ներկայացված տեղեկատվության որակը:
Հանձնաժողովի նախագահ Ծովինար Վարդանյանը նշել է, որ պետական բոլոր մարմինները նույն պայմաններով են հաշվեքննության ենթարկվելու, չի կարող լինել առանձնացված պայման, օրինակ՝ Կենտրոնական բանկի կամ Առողջապահության նախարարության համար:
Հարցն արժանացել է հանձնաժողովի դրական եզրակացությանը»,- գրել է Մանավազյանը:
