Սոչիի հայ համայնքի երիտասարդ ներկայացուցիչները իսկապես զրույցի համար հրավիրվել էին իրավապահ մարմիններ` թեքվանդոյի սպորտի վարպետ Յուրի Գարանյանի սպանության գործով: Այդ մասին NEWS.am-ի թղթակցի հետ զրույցում հայտնել է Սոչիի Հայերի միության նախագահ, «ՏՎԶՎ» հեռուստաընկերության գլխավոր տնօրեն Վալերի Թորոսյանը:
Ինչպես հաղորդվել էր ավելի վաղ, մայիսի 1-ին Սոչիում զանգվածային կռիվ է տեղի ունեցել, որին մասնակցել են շուրջ 100 մարդ: Կռվի մասնակիցներից մեկը վախճանվել էր դանակի հարվածից: Նա Սոչիի հայտնի մարզիկ, թեքվանդոյի սպորտի վարպետ 24-ամյա Յուրի Գարանյանն էր: Գարանյանի ծանոթներից մեկն իր կնոջ հետ զբոսնելիս է եղել «Ռիվիերա» այգում: Զույգին մոտեցել են մի խումբ մարդիկ, որոնցից մեկն իր պահվածքով վիրավորել է աղջկան: Տղամարդը հարվածել էր նրան բռուցքով, սակայն կոնֆլիկտն այդքանով չէր ավարտվել եւ շարունակվել էր Դոնի փողոցի եւ Վինոգրադյան խաչմերուկի շրջադարձում: Յուրի Գարանյանը պաշտպանել է 35-ամյա ծանոթն, եւ կռվում նրան դանակահարել են:
Ինչպես հայտնել է Վալերի Թորոսյանը, ոստիկանություն կանչված երիտասարդ հայերին առաջարկվել է հայտնել` ինչ է հայտնի նրանց կատարվածի մասին: Թորոսյանը հաստատել է լարվածության աճը դաղստանցիների հետ հարաբերություններում: «Իրենց անշնորհք են պահում, հրահրում են, հետապնդում կանանց: Բացակայում է տարրական քաղաքավարի պահվածքը»: Վալերի Թորոսյանը նաեւ հայտնել է, որ մայիսի 12-ին Ադլերի «Գարուն» պանսիոնատում տեղի կունենա միջազգային կլոր սեղան: Սպասվում է, որ նրան կմասնակցի նաեւ Ռուսաստանի Հայերի միության նախագահ Արա Աբրահամյանը: