ԱՄՆ նախագահ Բարակ Օբամայի կողմից Ադրբեջանում ԱՄՆ-ի դեսպանի պաշտոնի թեկնածու առաջադրված Ռիչարդ Մորնինգսթարը Սենատում հայտարարել է, որ իր թեկնածությունը դեսպանի պաշտոնում հաստատվելու դեպքում մտադիր է անձամբ զբաղվել Ադրբեջանի տարածքում հայկական տապանաքարերի ոչնչացման հետաքննությամբ:
«Ես մտադիր եմ այցելել Ջուղա և կանեմ հնարավորինս ամեն ինչ այդ պատահարի հետաքննության համար, ինչպես նաև այն բանի համար, որպեսզի հայկական գերեզմանոցը պաշտպանված լինի և պահպանվի որպես հուշարձան»,- հայտարարել է Մորնինգսթարը` ելույթ ունենալով Սենատի միջազգային հարցերի հանձնաժողովի նիստում և պատասխանելով Նյու Ջերսիից ընտրված սենատոր Ռոբերտ Մենենդեզի հարցերին:
-Դուք խոստանո՞ւմ եք անել դա,–հստակեցրել է Մենենդեզը:
-Ես կաշխատեմ, եթե դա ինձ հաջողվի,- պատասխանել է Մորնինգսթարը:
-Այսինքն, միայն Ադրբեջանի իշխանությունների անմիջական արգելքը կարո՞ղ է խանգարել Ձեզ այցելել Ջուղա:
Լռություն:
-Ես միայն ուզում եմ հասկանալ, թե որքանո՞վ եք Դուք պատրաստ անել դա,- շարունակել է Մենենդեզը:
-Լավ, ես խոստանում եմ, որ կանեմ ամեն ինչ, ինչը իմ ուժերի սահմաններում է, որպեսզի այցելեմ Ջուղա, հետաքննեմ այդ իրադարձությունը, ինչպես նաև այն բանի համար, որպեսզի պաշտպանեմ Ադրբեջանում հայկական եկեղեցու իրավունքները,- հայտարարել է Ռիչարդ Մորնինգսթարը: