Նավթ արտահանող երկրների կազմակերպության (ՕՊԵԿ) երկրների նախարարներն այսօր Վիեննայում կքննարկեն նավթարդյունահանման ծավալները:
Ինչպես ավելի վաղ հաղորդել էր «Ազատություն» ռադիոկայանը, մարտից սկսած նավթի բարելն էժանացել է 30 դոլարով` 100 դոլարի ցուցանիշից ներքեւ իջնելով: Վերլուծաբանները մասամբ դա բացատրում են Սաուդյան Արաբիայում հում նավթի արդյունահանման ավելացմամբ այն բանից հետո, երբ պատժամիջոցների արդյունքում կճատվեց Իրանից համաշխարհային շուկա մատակարարվող նավթի ծավալը:
Ինչպես հաղորդել էր NEWS.am-ը, Թեհրանն արդեն Էր Ռիյադին զգուշացրել էր հետեւանքների մասին, եթե Սաուդյան Արաբիան ավելացներ վաճառքն այն երկրներին, որոնք այլեւս իրանական նավթ չեն ստանում:
ՕՊԵԿ-ում Իրանի ներկայացուցիչ Մոհամեդ ալ Հաթիբը նախորդ շաբաթ հայտարարել էր, որ նավթի գնի շարունակական անկման պատճառներից մեկը նավթարդյունահանման սահմանված քվոտաների գերազանցումն է: Նավթի արդյունահանման հիմնական ծավալները բաժին են ընկնում Սաուդյան Արաբիային, Քուվեյթին եւ Արաբական միացյալ էմիրություններին:
Իրանի նավթային արդյունաբերության նախարարը ՕՊԵԿ-ի ղեկավարին քվոտաների խախտման դեմ բողոք է ուղարկել:
