Մայր աթոռ սուրբ Էջմիածնում, այսօր` հունիսի 27-ին, Գարեգին Բ կաթողիկոսն ընդունել է Ավստրիայի նախագահ Հայնց Ֆիշերին` Հայաստանի ԱԳ նախարար Էդվարդ Նալբանդյանի ուղեկցությամբ:
Գարեգին Բ-ն նշել է, որ Հայաստանի եւ Ավստրիայի միջեւ հարաբերությունները զարգանում են եւ ընդլայնվում` նոր արդյունքներ արձանագրելով երկու երկրների համագործակցության նորօրյա պատմության մեջ: Նա վստահություն է հայտնել, որ Ավստրիայի նախագահի այցը նոր լիցք պիտի հաղորդի դարերի պատմական սերտ առնչակցություններ ունեցող երկու ժողովուրդների կապերի ամրապնդմանը:
Կաթողիկոսն անդրադարձել է Ավստրիայի հայ համայնքի հանդեպ իշխանությունների կողմից դրսեւորվող առանձնահատուկ ջերմ վերաբերմունքին:
Իր հերթին նախագահ Ֆիշերն անդրադարձել է Ավստրիայում հայկական եկեղեցու եւ համայնքի առկայության կարեւորությանը, այնուհետեւ Ավստրիա այցելելու հրավեր ուղղել Գարեգին Բ-ին:
Զրույցի ընթացքում խոսվել է նաեւ Հայ առաքելական եւ Հռոմի կաթոլիկ եկեղեցիների եղբայրական հարաբերությունների եւ գործակցության մասին, անդրադարձ է կատարվել տարածաշրջանում խաղաղության պահպանմանն ի խնդիր կազմակերպվող հոգեւոր առաջնորդների քառակողմ եւ եռակողմ հանդիպումներին: