Վանո Մերաբիշվիլին այսպես թե այնպես կատարում էր վարչապետի գործառույթները, իսկ պաշտոնական նշանակումից հետո նա պարզապես պաշտոնական կարգավիճակ ստացավ: Այս մասին «IPN» -ին տված հարցազրույցում ասել է Վրաստանի Քրստոնյա-դեմոկրատական շարժման առաջնորդ Գեորգի Թարգամաձեն:
Նրա խոսքով` այդ որոշմամբ Սահակաշվիլին գրեթե փաստացի ընդունել է, որ երկրում կմնա իշխանությունների պահպանմանն ուղղված պետական մոդելը:
Միաժամանակ` Մերաբիշվիլին արդեն խոսել է ապագայի ծրագրերի մասին: Նրա խոսքով` կառավարության հիմնական գերակայությունները լինելու են զբաղվածությունը, գյուղի եւ առողջապահության զարգացումը: «Իմ եւ իմ թիմի հիմնական խնդիրը ժողովրդին ավելի շատ օգտակար լինելն է: Ժամանակն է, որ մեր զարգացման արդյունքներն անմիջականորեն զգա Վրաստանում բնակվող յուրաքանչյուր ընտանիք»,-հայտարարել է նա:
Մերաբիշվիլին խոստացել է, որ հուլիսի 2-ին կներկայացնի աշխատանքային ծրագիրը:
Ինչպես տեղեկացրել էր NEWS.am-ը, նախագահ Սահակաշվիլին ՆԳ նախարար Մերաբիշվիլիին վարչապետ էր նշանակել երեկ:
