Աշխարհի ուժեղները մեկ անգամ եւս ցույց տվեցին, որ իրենց համար ժամանակավոր շահերը ավելի կարեւոր են, քան հիմնարար սկզբունքները, որոնց մասին նրանք հայտարարում էին եւ որոնց կարծես թե պետք է դավանեին: Այս մասին NEWS.am-ի թղթակցի հետ զրույցում ասաց Հայաստանի Գիտությունների ազգային ակադեմիայի Արեւելագիտության ինստիտուտի տնօրեն, թուրքագետ Ռուբեն Սաֆրաստյանը` անդրադառնալով Ֆրանսիայի արտգործնախարար Լորան Ֆաբիուսը հայտարարությանը, թե Ֆրանսիայում Հայոց ցեղասպանության ժխտումը քրեականացնող նոր օրենք կարող է չընդունվել:
«Որքան ինձ հայտնի է, սոցիալիստ Օլանդը մինչեւ նախագահ դառնալը խոստացել էր, որ կշարունակի այս գործընթացը, հիմա մենք տեսնում ենք, որ հակառակ բանն է տեղի ունենում: Ցավով արձանագրում ենք, որ մեկ անգամ եւս տեղի է ունեցել այն, ինչին մեր ժողովուրդը պատմության ընթացքում բազմիցս հանդիպել է»,- ասաց նա:
Ռուբեն Սաֆրաստյանը կարծիք հայտնեցին, որ հայ ժողովուրդը պետք է շարունակի պայքարել, հետապնդել այդ հարցը, օրինակ` Դաշնակցությունը բավականին սերտ կապեր ունի սոցիալիստական կուսակցության հետ: Նրա խոսքով` որոշ ժամանակ հետո, երբ Ֆրանսիայում նոր ընտրություններ մոտենան, այդ հարցը արդիական կդառնա: «Իմ մոտ այնպիսի տպավորություն է, որ Ֆրանսիայի քաղաքականությունը Թուրքիայի նկատմամբ փոխվում է, ի տարբերություն Սարկոզիի, սոցիալիստները կողմ են Թուրքիայի` Եվրաինտեգրման գործընթացի արագ զարգացմանը եւ նրանք շահագրգռված են Թուրքիայի Եվրաինտեգրման գործընթացով: Այս առումով այն, ինչ որ տեղի ունեցավ հայկական օրինագծի հետ, փաստորեն դա ընդհանուր քաղաքականության մասն է կազմում, այսինքն` Ֆրանսիայի ներկայիս կառավարող ուժերը, սոցիալիստները, ձախակողմյանները, կողմ են Թուրքիայի Եվրաինտեգրման գործընթացին»,- ասաց Ռուբեն Սաֆրաստյանը:
Ավելի վաղ NEWS.am-ը հայտնել էր, որ Ֆրանսիայում չի լինի Հայոց ցեղասպանության ժխտումը քրեականացնող նոր օրենք: Դա հասկացրել է Ֆրանսիայի արտգործնախարար Լորան Ֆաբիուսը հուլիսի 5-ին իր թուրք գործընկերոջ` Ահմեդ Դավութօղլուի հետ հանդիպումից հետո կայացած մամուլի ասուլիսում: «Անհնար է կանգնել նույն ճանապարհին, այլապես արդյունքը, ակնհայտ է, նույնն է լինելու»,- հայտարարել էր Լորան Ֆաբիուսը:
Նշենք, սակայն, որ 2012թ. ապրիլի 24-ին` Հայոց ցեղասպանության ոգեկոչման օրը Ֆրանսիայի նախագահ Ֆրանսուա Օլանդը մամուլի առջեւ հաստատել էր օրենքի նոր տեքստը ուսումնասիրելու պատրաստակամությունը:
