Հուլիսի 21-ին ռուսական Կիսլովոդսկ քաղաքում տեղի ունեցած զանգվածային կռվի ժամանակ կրակել են հայի վրա: 21-ամյա Ջոնիկին առաջինն են սպանել: Վեճի կենցաղային լինելու վերաբերյալ իրավապահների վարկածը հերքվում է համացանցում տեղ գտած մանրամասներով:
Ինչպես հաղորդում է Irsolo.ru-ն, դեպքը տեղի է ունեցել հուլիսի 21-ին Կիսլովոդսկի կենտրոնում`ժամը 18:00-ին: Երեք երիտասարդներ կանգնած են եղել Պերվոմայսկի պողոտայում սրճարանի դիմաց եւ խաղաղ զրուցելիս են եղել: Նրանց է մոտեցել համազգեստով կազակների հերթապահ ջոկատը: Խոսքից խոսք է ծագել, եւ երեք կովկասցիները հայտնվել են գետնին, ականատեսի խոսքերը մեջբերում է «Մոսկովսկի կոմսոմոլեցը»:
Ըստ որոշ տվյալների` առաջինը կրակել են հային, 17-ամյա Գիա անունով վրացու կոկորդն են կտրել, իսկ 23-ամյա կարաչաեւցուն դանակահարել են: Առաջին երկուսը մահացել են, երրորդը տեղափոխվել է վերակենդանացման բաժանմունք: Նաեւ կորուստներ կարող են լինել հակառակ կողմից, ականատեսները պատմել են, որ համազգեստով մարդիկ տարել են իրենց վիրավոր երեք ընկերներին:
Իրավապահ մարմինները տեղեկատվությունը չեն մեկնաբանում` շարունակելով պնդել, որ պատճառը եղել է իբր «կենցաղային վեճը»: